Ցանկացած երկրի ընդդիմություն առաջնահերթ կշտամբում է իր իշխանությանը, ոչ թե ուրիշի: Այս մասին նոյեմբերի 24-ին խորհրդարանում Եվրասիական Միությանը Հայաստանի անդամակցության հարցով լսումների ընթացքում հայտարարել է ՀՀ փոխարտգործնախարար Շավարշ Քոչարյանը՝ ի պատասխան «Ժառանգություն» խմբակցության պատգամավոր Զարուհի Փոստանջյանի դիտարկմանը, թե Ռուսաստանն ու «իր օլիգարխիկ պուտինյան ռեժիմը՝ միլիարդավոր խաբեություններով, չարիք են դարձել» ոչ միայն այլ երկրների, այլեւ ռուսաստանցի ժողովրդի համար:
Ցանկացած նման հայտարարություն, այդ թվում նաեւ բարեկամական երկրի հասցեին, սրում է իրավիճակը եւ հավանական խնդիրների հանգեցնում, հավելել է Քոչարյանը: Ըստ նրա՝ անհրաժետ է հարգել բոլոր դաշնակիցներին: Ընդ որում, անկախ նրանից, թե ով ինչ կարծիք ունի այլ երկրի քաղաքական գործչի կամ տնտեսության վերաբերյալ, չպետք է դրանք այդպես կտրուկ բարձրաձայնել: «Ով ինչ ուզում է ասի, ԵՏՄ-ն տնտեսական կառույց է, եւ գործընկերների հասցեին քաղաքական գնահատականներն անտեղի են: Եթե դու միջամտում ես, դու հարեւանին էլ ես առիթ տալիս միջամտել ներքին գործերին եւ գնահատել դրանք», - ընդգծել է Շավարշ Քոչարյանը:
