Երեւանի Նոր Նորքի Սուրբ Սարգիս եկեղեցում սկսվել է ադրբեջանական զինված ուժերի կողմից խոցված հայկական ուղղաթիռի օդաչուների հոգեհանգստյան արարողությունը։ (ֆոտոռեպորտաժ)

NEWS.am-ի թղթակիցը հաղորդում է, որ եկեղեցում են Սերգեյ Սահակյանի, Սարգիս Նազարյանի եւ Ազատ Սահակյանի հարազատները, ընկերները, զինվորականներ, եւ բազմաթիվ այլ քաղաքացիներ, ովքեր գնացել են հրաժեշտ տալու եւ սփոփելու զոհված հայորդիների հարազատներին։

Եկեղեցին այնքան մարդաշատ է, որ դրսում ցավակցելու եկած քաղաքացիների հերթ է գոյացել։

Եվ Ազատ Սահակյանի մարմինը եւ մյուս երկուսի մասունքները փակ դագաղում են։

Հիշեցնենք, որ հոգեհանգիստը կշարունակվի մինչեւ ժամը 20։00-ն։ Սպասվում է, որ այսօր Սուրբ Սարգիս եկեղեցի  կայցելեն Հայաստանի եւ ԼՂՀ բարձրաստիճան պաշտոնյաներն ու զինվորականները։

Նոյեմբերի 25-ին՝ ժամը 13.00-ին, զոհված օդաչուների աճյունները Սուրբ Սարգիս եկեղեցուց կտեղափոխվեն «Եռաբլուր» զինվորական պանթեոն, որտեղ նրանց կհուղարկավորեն զինվորական արարողակարգով:

Հիշեցնենք, որ ԼՂՀ ՊՆ-ի փոխանցմամբ՝ ղարաբաղա-ադրբեջանական սահմանի արեւելյան հատվածի օդային տարածքում նոյեմբերի 12-ին, ժամը 13.45-ի սահմանում ուսումնավարժական թռիչքի ժամանակ ադրբեջանական ԶՈւ-ի կողմից հրադադարի ռեժիմի խախտման արդյունքում խոցվել էր ԼՂՀ ՌՕՈւ «Մի-24» ուղղաթիռը: Խոցման վայրը շփման գծին չափազանց մոտ էր: Հակառակորդը շարունակում էր տարբեր տրամաչափի հրաձգային զենքերից ինտենսիվ կրակ վարել դեպքի վայրի ուղղությամբ՝ թույլ չտալով մոտենալ ուղղաթիռի անկման վայրին: Ուղղաթիռի խոցումից տասն օր անց՝ նոյեմբերի 22-ին, ԼՂՀ զինված ուժերը հատուկ գործողություն իրականացրին, որի արդյունքում դուրս բերեցին եւ ընտանիքներին հանձնեցին Ազատ Սահակյանի դին, Սերգեյ Սահակյանի եւ Սարգիս Նազարյանի մասունքները։