Ադրբեջանի կողմից նոյեմբերի 12-ին հայկական ուղղաթիռի խոցումը զգոնության կորստի հետեւանք չէր, այլ թշնամու կողմից նախապես մշակված, պլանավորված երեւույթ: Այս մասին այսօր՝ նոյեմբերի 24-ին, խոցված ուղղաթիռի անձնակազմի հոգեհանգստի ժամանակ մի քանի լրագրողների հետ զրույցում ասաց զոհված օդաչու Սերգեյ Սահակյանի հրամանատարը, որը խնդրեց իր անունը չհրապարակել։ (ֆոտոռեպորտաժ)
Նա պատմեց, որ Սերգեյի հետ ինքը ծանոթացել է 21 տարի առաջ, երբ միասին ընդունվել են ասացին Ռազմական ավիացիայի ինստիտուտ։
«Երազում էինք դառնալ գրագետ օդաչուներ, որ անառիկ պահենք մեր հայրենիքի սահմանները։ Սերգեյը 2-րդ կարգի օդաչու, հրահանգիչ էր, նրա համար թռիչքուղին նոր չէր, լավագույններից լավագույններն են մասնակցում զորավարժություններին, նա բազմիցս թռել է այդ թռիչքուղով։ Սերգեյն ամենահամեստ, ամենագրագետ օդաչուներից էր»,- ասաց զոհված օդաչուի հրամանատարը։
NEWS.am-ի հարցին, թե այդ օրն ինչ տրամադրվածություն ուներ Սերգեյը, հրամանատարը պատասխանեց. «Օդաչուն միշտ բարձր տրամադրվածությամբ է թռչում, նա շատ լավ տրամադրություն ուներ»։
Հիշեցնենք, որ ԼՂՀ ՊՆ-ի փոխանցմամբ՝ ղարաբաղա-ադրբեջանական սահմանի արեւելյան հատվածի օդային տարածքում նոյեմբերի 12-ին, ժամը 13.45-ի սահմանում ուսումնավարժական թռիչքի ժամանակ ադրբեջանական ԶՈւ-ի կողմից հրադադարի ռեժիմի խախտման արդյունքում խոցվել էր ԼՂՀ ՌՕՈւ «Մի-24» ուղղաթիռը: Խոցման վայրը շփման գծին չափազանց մոտ էր: Հակառակորդը շարունակում էր տարբեր տրամաչափի հրաձգային զենքերից ինտենսիվ կրակ վարել դեպքի վայրի ուղղությամբ՝ թույլ չտալով մոտենալ ուղղաթիռի անկման վայրին: Ուղղաթիռի խոցումից տասն օր անց՝ նոյեմբերի 22-ին, ԼՂՀ զինված ուժերը հատուկ գործողություն իրականացրին, որի արդյունքում դուրս բերեցին եւ ընտանիքներին հանձնեցին Ազատ Սահակյանի դին, Սերգեյ Սահակյանի եւ Սարգիս Նազարյանի մասունքները։
