ԱՄՆ-ում դատարանը բավարար հիմքեր չի գտել ոստիկան Դարեն Ուիլսոնի դեմ քրեական գործ հարուցելու համար, որը 2013թ. ամերիկյան Ֆերգյուսոն քաղաքում սպանել էր 18-ամյա աֆրոամերիկացի Մայքլ Բրաունին: Այս մասին, ՏԱՍՍ-ի փոխանցմամբ, հայտարարել է դատախազ Բոբ Մաքքալոքը:
Գործակալությունը հիշեցնում է, որ Բրաունը սպանվել էր օգոստոսի 9-ին՝ այն բանից հետո, երբ հրաժարվել էր ենթարկվել իրավապահների պահանջին եւ նրանցից մեկի հետ ձեռնամարտի բռնվել: Իրավապահը պնդում է, որ գործել է ինքնապաշտպանության շրջանակում, քանի որ Բրաունը իբրեւ թե ցանկացել էր նրանից խլել ատրճանակը:
Ոստիկանն ընդհանուր առմամբ վեց գնդակ է արձակել դեռահասի վրա: Ատենակալները 12 հոգի են եղել՝ 9 սպիտակամորթ եւ երեք աֆրոամերիկացի:
Դատարանի որոշումից հետո ամերիկյան Ֆերգյուսոն քաղաքի հարյուրավոր բնակիչներ փողոց են ելել՝ բողոքելով որոշման դեմ: Նրանք ոստիկանների վրա քարեր եւ շշեր են նետել, նաեւ՝ ոստիկանական մի քանի մեքենա այրել: Ցուցարարներին ցրելու համար ոստիկաններն արցունքաբեր գազ են կիրառել:
Բողոքի ցույցեր են ընթանում նաեւ ԱՄՆ-ի այլ քաղաքներում, այդ թվում՝ Նյու Յորքում, Չիկագոյում, Ֆիլադելֆիայում եւ Լոս Անջելեսում: