Ճապոնական խոշոր ավտոարտադրող Honda Motor ընկերությունը ԱՄՆ -ի իշխանություններին չի հաղորդել 2003թ.-ից ի վեր 1,73 հազար վթարների մասին, որոնք տեխնիկական անսարքությունների պատճառով հանգեցրել են վնասվածքների կամ մարդկային զոհերի: Այս մասին հաղորդում է «ՌԻԱ Նովոստին»՝ վկայակոչելով Կիոդո գործակալությանը:
Աղբյուրի փոխանցմամբ՝ վերոնշյալ փաստը պարզաբանվել է ամերիկյան Bowman and Brooke իրավաբանական ընկերության կողմից կատարված անկախ աուդիտորական ստուգման ժամանակ: Ամերիկյան օրենսդրությանը համապատասխան՝ բոլոր ավտոարտադրողները անսարքությունների պատճառով տեղի ունեցած յուրաքանչյուր դեպքի մասին պարտավոր են հաղորդել ԱՄՆ երթեւեկության անվտանգության ազգային վարչակազմին:
Ստուգումների ընթացքում բացահայտվել է, որ 11 տարիներին՝ 2003-ի հուլիսի 1-ից մինչեւ 2014-ի հունիսի 30-ը, ԱՄՆ իշխանություններին հայտնի է դարձել ճանապարհատրանսպորտային պատահարների միայն 1144 դեպքերի մասին, այնինչ վթարների իրական թիվը մոտ է 3 հազարին: Թվարկված վնասվածքների կամ մահվան ելքով դեպքերից 8-ի պատճառը եղել է ճապոնական Takata Corp արտադրողի անվտանգության բարձիկների անսարքությունը: