Բանկերի ներսում խարդախություններից ապահովագրված լինելը օգտակար կլինի նաեւ Հայաստանի համար: Այս մասին նոյեմբերի 25-ին Երեւանում բանկերի համար կազմակերպված սեմինարի ընթացքում հայտարարել է ապահովագրական բրոքերների ընկերության գործադիր տնօրեն Վլադիմիր Կրյուչկովը: Հանդիպման կազմակերպիչն էր «ԻՆԳՈ Արմենիա» ապահովագրական ընկերությունը:
Քանի որ ֆինանսական խարդախությունը շատ բարդ է ապացուցելը, այդ ռիսկերը, որպես կանոն, տեղի ապահովագրողներից վերաապահովագրվում են միջազգայիններին, հավելել է Կրյուչկովը: Ըստ նրա՝ հարկ է հաշվի առնել, որ բանկերը, որպես կանոն, տեղեկություններ չեն հայտնում իրենց մոտ խախտումներ կատարած անձանց մասին: Իմաստը բացասական արձագանքից խուսափելն է, անգամ՝ նեղմասնագիտական շրջանակում, էլ ուր մնաց՝ պոտենցիալ բիզնես-գործընկերների եւ մամուլի շրջանում:
Բայց արդյունքում անբարեխիղճ աշխատողը հնարավորություն է ստանում որոշ ժամանակ անց աշխատանքի անցնել այլ բանկում եւ կատարելագործել մեքենայությունները՝ հաշվի առնելով նախորդ սխալները:
Այսպես թե այնպես, պոտենցիալ ցանկացած ապահովագրական դեպք կարող է հիվանդագին լինել բանկի ոչ միայ հեղինակության, այլեւ եկամուտների համար. հափշտակումները կարող են միլիոնավոր դոլարների հասնել եւ կատարվել տարբեր եղանակներով:
«Բնականաբար, հափշտակումները չեն կարող առանց բանկի աշխատակիցների կատարվել: Ավելին ասեմ. նման ռիսկերից ապահովագրված չեն անգամ ամենախոշոր բանկերը: Ռուսաստանի առաջատար 20 բանկերից գրեթե ոչ մեկը չի կարողացել զերծ մնալ դրանից: Այնպես որ, ներքին խարդախությունը շրջաններով կամ երկրով սահմանափակված չէ: Իսկ ապահովագրումը կօգնի պաշտպանվել ֆինանսական կորուստներից», - ամփոփել է Կրյուչկովը:
Լուսանկարը՝ Արսեն Սարգսյանի / NEWS.am