ICANN կազմակերպության կողմից «.հայ» ինտերնետային նոր դոմենի գրանցումը մեծապես կնպաստի հայոց լեզվի զարգացմանը, օգտագործմանը, ինչպես նաեւ Հայաստան-Սփյուռք կապերի ընդլայնմանը։ Այս մասին այսօր՝ նոյեմբերի 25-ին, լրագրողների հետ հանդիպմանն ասաց «Ինտերնետ հանրություն» ՀԿ նախագահի տեղակալ Գրիգոր Սաղյանը՝ ավելացնելով, որ մեսրոպատառ դոմենը կգործի արդեն դեկտեմբերից եւ կանցնի 3-6-ամսյա փորձաշրջան։
«Երբ կազմակերպությունը նախաձեռնեց այս գործընթացը, բազմաթիվ փորձագիտական քննություններ եւ լսումներ էր անցկացնում, բայց ամենասկզբից ICANN-ը հայտարարեց, որ մենք չգիտենք՝ ինչ զարգացումներ են լինելու, մենք պետք է գրանցենք եւ կտեսնենք, թե ինչպես կզարգանա։ Բայց հստակ վիճակագրություն, թե ինչպես կլինի Հայաստանի դեպքում, ոչ մեկ չունի։ Անհրաժեշտ է փորձել, նոր հետո տեսնել, թե ինչ կստացվի»,- ասաց Գրիգորի Սաղյանը։
Նա նշեց, որ մեսրոպատառ դոմենի գրանցմանն աջակցել են մի շարք պետական կառույցներ՝ Կառավարությունը, Գիտությունների ակադեմիան եւ Լեզվի պետական տեսչությունը։
«Առանց պետության կողմից սատարման հնարավոր չէ գրանցել երկրի դոմեն, եւ ICANN-ի ներկայացվող փաստաթղթերում անհրաժեշտ է ստանալ կառավարությունը ներկայացնող մարմինից սատարող համապատասխան գրություններ։ Բոլոր կառույցները, որոնք սատարում են դոմենի գրանցմանը, համապատասխան գրությունները նախ քննարկել, հետո տրամադրել են»,- ասաց Գրիգոր Սաղյանը։
«Ինտերնետ հանրություն» ՀԿ անդամները նշեցին, որ հայալեզու դոմենի օգտագործումը կարող է նպաստել հայկական ինտերնետի որոշակի մեկուսացմանը, սակայն դա կպարզվի միայն դոմենի գործարկումից հետո։
Մեդիափորձագետ Սամվել Մարտիրոսյանի խոսքով՝ հայալեզու դոմենը հաքերային հարձակումներից պաշտպանելու առումով առկա խնդիրներին նորերը չի ավելացնի։
