Դոնեցկի ապստամբները պահանջում են ՄԱԿ-ի Անվտանգության խորհրդի արտակարգ նիստ հրավիրել եւ դիտարկել խաղաղարարների միջամտության հարցը՝ «ավելի վաղ ձեռք բերված պայմանավորվածությունների իրականացման վերահսկողություն կատարելու եւ մարդասիրական ու սոցիալական իրավիճակը լուծելու համար»: Այս մասին գրում է RBK-ն՝ վկայակոչելով Դոնեցկի ժողովրդական հանրապետության (ԴԺՀ) ժողովրդական խորհրդի նախագահության հայտարարությունը:
Աղբյուրի փոխանցմամբ, ապստամբների այդ որոշման վրա ազդել են Ուկրաինայի նախագահ Պյոտր Պորոշենկոյի եւ վարչապետ Արսենի Յացենյուկի գործողությունները: «Իրենց վերջին գործողություններով (նրանք) վերջնականապես ուկրաինական պետությունը հակադրեցին Դոնբասի ժողովրդին: Դոնեցկի եւ Լուգանսկի Ժողովրդական հանրապետություններին շրջափակում հայտարարեցին: Նախօրեին ընդունված նորմատիվ-իրավական ակտերի համաձայն՝ բյուջետային բոլոր հաստատությունները, որոնք գտնվում են ԴԺՀ-ի տարածքում, պետք է դուրս բերվեն ուկրաինական կողմի վերահսկողության տակ գտնվող տարածքներ: Բյուջետային աշխատողների բոլոր վճարումները կասեցվել են: Պաշտոնյաները պարտավորվում են աշխատավարձեր եւ կենսաթոշակներ վճարել միայն նրանց, ովքեր դուրս են եկել Դոնեցկի եւ Լուգանսկի ժողովրդական հանրապետությունների տարածքից եւ հաշվառման են կանգնել»,- ասված է ԴԺՀ-ի հայտարարությունում:
Դոնեցկի ժողովրդական հանրապետության վերահսկողության տակ գտնվող տարածքներում բնակվող զինյալների կարծիքով, իրենք Ուկրաինայի մյուս քաղաքացիների հետ հավասար իրավունքներ ունեն:
Նոյեմբերի 15-ին Ուկրաինայի նախագահ Պյոտր Պորոշենկոն կառավարությանը հանձնարարել է դադարեցնել պետական հաստատությունների, բանկերի եւ ձեռնարկությունների գործունեությունը ուժային գործողությունների անցկացման գոտում եւ ապահովել անձնակազմի տարհանումը: ԴԺՀ-ի եւ ԼԺՀ-ի առաջնորդներն իրենց հերթին քննադատել են այդ որոշումը:
Դոնբասի հասարակական գործիչներն ավելի ուշ դիմել են Ուկրաինայի ղեկավարությանը՝ պահանջելով չդադարեցնել սոցիալական վճարումները, այդ որոշումն անվանելով «անընդունելի եւ վիրավորական» եւ դրանում «սոցիալական ցեղասպանության նախանշաններ» տեսնելով:
