Մոսկվայի Տրոիցկի շրջանի դատարանի կողմից մեղավոր ճանաչված եւ 6 տարի 9 ամսվա բանտարկության դատապարտված Հրաչյա Հարությունյանի գործով Վճռաբեկ դատարան բողոք է ներկայացվելու: Այս մասին NEWS.am-ի թղթակցի հետ զրույցում ասաց Մարդու իրավունքների պաշտպանի խորհրդական Երանուհի Թումանյանցը: Տուժողների կողմից երկայացված հայցերը Վերաքննիչ դատարանը նույնպես մերժել էր նույն հիմնավորմամբ, ինչ Առաջին ատյանը, այսինքն՝ դրանք պետք է առանձին ներկայացվեն Քաղաքացիական դատարան:
Փաստաբանները Վճռաբեկ դատարան բողոք կներկայացնեն կամ այս, կամ մյուս շաբաթ, նրանք գտնում են, որ Հրաչյա Հարությունյանին կեղծ փաստաթղթեր ներկայացնելու մեղադրանքը անհիմն է: ՄԻՊ խորհրդականը շեշտեց, որ ըստ ՌԴ օրենսդրության՝ դատական ակտը մտել է ուժի մեջ՝ անկախ նրանից այն կբողոքարկվի, կբեկանվի, թե ոչ: Այժմ Հրաչյա Հարությունյանին տեղափոխել են կալանավայր՝ որպես դատապարատյալ, որտեղ ավելի լավ պայմաններ են, քան մեկուսարանում:
Երանուհի Թումանյանցը նշեց, որ այժմ պետք է պայմանավորվեն հարազատների հետ, որպեսզի դիմումներ գրեն եւ սկսեն նրա Հայաստան տեղափոխելու գործընթացը: «Դա չի խանգարում բողոքարկմանը, այդ գործընթացը բավական երկար է տեւում՝ փաստաթղթերի կազմում, տրամադրում, ուղարկում, մինչեւ վերջնական որոշում կայացնելը, հնարավոր է այդ ընթացքում ռեալ տեղափոխումը լինի»,-ասաց Երանուհի Թումանյանցը:
Հիշեցնենք, որ բեռնատարը, որի ղեկին եղել է Հրաչյա Հարությունյանը, 2013 թվականի հուլիսի 13-ին մխրճվել է Պոդոլսկից դեպի Կուրիլովո 64 ուղեւորի փոխադրող ավտոբուսի մեջ: Վթարի հետեւանքով 18 մարդ զոհվել է, ավելի քան 40-ը՝ վիրավորվել:
Հետաքննության արդյունքում պարզվել է, որ բեռնատարը հարկ եղածի պես չի սպասարկվել, ինչի արդյունքում արգելակման հետ կապված խնդիրներ է ունեցել: Ըստ հետաքննության, Հարությունյանը պետք է իմանար այդ մասին: Մոսկվայի քաղաքային դատարանը Հրաչյա Հարությունյանին դատապարտել է 6 տարի եւ 9 ամիս ժամկետով ազատազրկման: Մոսկվայի քաղաքային դատարանը անփոփոխ է թողել այդ դատավճիռը:
