«Ընդդեմ իրավական կամայականության» հասարակական կազմակերպությունը դիմել է միջազգային իրավապաշտպան կազմակերպություններին՝ առաջարկելով Լեռնային Ղարաբաղում ադրբեջանական դիվերսանտների նկատմամբ ընթացող դատական գործընթացի դիտարկում անցկացնել: Այդ մասին այսօր՝ նոյեմբերի 26-ին, մամուլի ասուլիսի ժամանակ հայտարարեց Հայաստանի առաջին օմբուդսմեն, «Ընդդեմ իրավական կամայականության» հասարակական կազմակերպության նախագահ Լարիսա Ալավերդյանը:
Նրա խոսքով՝ շատ կարեւոր է, որպեսզի այդ կազմակերպություններն ասեն իրենց խոսքը՝ ադրբեջանին թույլ չտալով խեղաթյուրել փաստերը: «Թվում է, որ դատական գործընթացի ժամանակ հեշտ է դրական մթնոլորտ ստեղծել, սակայն դա այդպես չէ: Ես խոսել եմ դիվերսանտների հետ. երկուսն էլ իրենց ճնշված չեն զգում, նրանք ասում են, որ իրենց նկատմամբ այդպիսի դրական վերաբերմունք չէին ակնկալում», - ընդգծեց Ալավերդյանը՝ հավելելով, որ նրանք նույնպես վարակված են այն ապատեղեկատվությամբ, որը տարածված է Ադրբեջանում: Առաջին օմբուդսմենը ղարաբաղյան կողմից դիվերսանտների նկատմամբ նման վերաբերմունքը առաջընթաց է համարում: «Սա վկայում է այն մասին, որ Լեռնային Ղարաբղաը ընդունակ է ինքնուրույն գործողությունների՝ հարգելով միջազգային իրավունքը», - եզրափակեց Լարիսա Ալավերդյանը:
Հիշեցնենք, որ ամբաստանյալները ադրբեջանական դիվերսիոն-հետախուզական խմբի երկու անդամներն են՝ Դիլհամ Ասկերովը եւ Շահբազ Գուլիեւը: Նրանց նկատմամբ մեղադրանք է առաջադրվել ԼՂՀ-ի Քրօր.-ի մի շարք հոդվածներով:
