Վրաստանը Ռուսաստանի հետ Աբխազիայի տարածքով երկաթուղային հաղորդակցումը վերականգնելու բանակցություններ չի վարում: Այս մասին, ըստ «Էխո Կավկազա»-ի, հայտարարել է Վրաստանի արտգործնախարար Թամարա Բերուչաշվիլին:
«Ոչ մի բանակցություն էլ չի տարվում: Եվս մեկ անգամ ցանկանում եմ ընդգծել, որ ցանկացած ենթակառուցվածքային կամ այլ նախագիծ կդիտարկվի միայն այն դեպքում, եթե համապատասխանում է Վրաստանի պետական շահերին»,- ասել է նա:
Նոյեմբերի 24-ին ՌԴ նախագահը հայտարարել էր, որ Ռուսաստանը եւ Աբխազիան ընդհանուր համաձայնությամբ կարող են երկաթուղային տարանցիկ հաղորդակցում կազմակերպել Սուխում-Թբիլիսի-Երեւան ուղղությամբ: Ըստ նրա՝ նման տեսակի նախագծերը կնպաստեն բոլոր շահագրգիռ կողմերի միջեւ հարաբերությունների զարգացման համար պայմանների ստեղծմանը: