Նոյեմբերի 25-ի լույս 26-ի գիշեր՝ ժամը 3-ի սահմաններում, չարագործները փորձել են հրկիզել Հիմնադիր խորհրդարանի պատգամավորության թեկնածու Շահեն Պողոսյանի անձնական օգտագործման ավտոմեքենան: Այս մասին հայտարարություն է տարածել «100-ամյակը առանց ռեժիմի» շարժումը:

«Ավտոմեքենան մասամբ է այրվել, քանի որ դեպքի վայր ժամանած հրշեջ խումբը հասցրել է մարել կրակը: Մեքենայի վրայից պոկել են նաեւ «100-ամյակը առանց ռեժիմի» գրությամբ ինքնասոսնձվող պիտակը: Շահեն Պողոսյանի ավտոմեքենան կայանված է եղել Նալբանդյան փողոցի վրա՝ ԱԱԾ-ի շենքի դիմաց:  Ուժեղացված մշտական հսկողության եւ տեսադիտարկման տակ գտնվող տարածքում նման արարքի կատարումը, որը զուգորդված է ավտոմեքենայի սեփականատիրոջ քաղաքական գործունեությունը խորհրդանշող գրությամբ պիտակը պոկելով, հուշում է, որ, ամենայն հավանականությամբ, այդ արարքի շարժառիթն անձնական չէ: «100-ամյակը առանց ռեժիմի»  շարժումը ընդունում է նաեւ այսօրինակ մարտահրավերները եւ հավաստիացնում, որ անկախ ամեն ինչից, Շարժումը 2015 թ. ապրիլի  24-ին ոտքի է հանելու մեր ժողովրդին եւ հեռացնելու է ռեժիմին»,-ասված է հայտարարությունում: