«Նախախորհրդարանի» անդամ Գեւորգ Սաֆարյանի վրա այսօր՝ նոյեմբերի 27-ին, հարձակվել են եւ կոշտ առարկայով հարվածել նրա գլխին: Այս մասին NEWS.am-ին ասաց «Նախարորհրդարանի» անդամ Կարո Եղնուկյանը:
Նրա խոսքով՝ Գեւորգ Սաֆարյանը կորցրել է գիտակցությունը եւ տեղափոխվել «Սուրբ Գրիգոր Լուսավորիչ» բժշկական կենտրոն:
«Գլուխը բացվել է, հիմա հիվանդանոցում է: Սա շարունակությունն է նոյեմբերի 26-ի գիշերը տեղի ունեցած ավտոմեքենաների վրա հարձակման»,- ասաց նա:
Դեպքը տեղի է ունեցել Խանջյան փողոցի վրա: «Այս միջադեպը եւս մեկ անգամ ապացուցում է, որ նախորդ գիշերներին տեղի ունեցածը, մասնավորապես՝ Հիմնադիր Խորհրդարանի պատգամավորության թեկնածուների ավտոմեքենաների հրկիզումը, ծրագրավորված հարձակում է, որն ունի քաղաքական շարժառիթ եւ ուղղված է «100-ամյակը առանց ռեժիմի» շարժման դեմ:
«100-ամյակը առանց ռեժիմի» շարժումը եւս մեկ անգամ հիշեցնում է, որ մարտահրավերն ընդունված է, եւ հայտնում է իր հաստատակամությունը, որ ապրիլի 24-ին ժողովրդի կամքի պարտադրմամբ հեռացնելու է ռեժիմին»,- ասվում է «Նախախորհրդարանի» տարածած հաղորդագրության մեջ:
Նշենք, որ նոյեմբերի 26-ի գիշերն անհայտ անձինք վնասել են 7 ակտիվիստների մեքենաներ: