Աբխազական երկաթուղին անհրաժեշտություն է Հայաստանի տնտեսության զարգացման համար, եւ մենք միշտ հանդես ենք եկել ցանկացած քայլի օգտին, լինի դա ռուսական, թե վրացական կողմից, որը կնպաստեր երկաթուղու վերականգնմանը: Այս մասին NEWS.am-ի թղթակցի հետ զրույցում հայտարարեց Հայաստանի Ազգային ժողովի փոխխոսնակ, ՀՀԿ մամուլի քարտուղար Էդուարդ Շարմազանովը:
Եվ հայկական կողմի այլ կարծիքը, ըստ նրա, անտրամաբանական կլիներ: «Մենք շահագրգռված ենք, որպեսզի Հայաստանի համար հաղորդակցման բոլոր միջոցները բացվեն, քանի որ դա եւս մեկ խթան կլինի մեր երկրի տնտեսության զարգացման համար: Ներկայում Հայաստանը լուրջ խնդիրներ ունի Թուրքիայի եւ Ադրբեջանի հետ. Թուրքիան Հայաստանին շրջափակման մեջ է պահում, նույն քաղաքականությունն է վարում նաեւ Ադրբեջանը: Եվ այդ երկաթուղու բացումը Հայաստանի շահերից է բխում»,- ընդգծեց Շարմազանովը:
Հիշեցնենք, որ ավելի վաղ աբխազական երկաթուղու վերականգնման հնարավորության մասին հայտարարել էր Ռուսաստանի նախագահ Վլադիմիր Պուտինը: «Հնարավոր ենք համարում այլ գործընկերների հետ մտածել եւ, ընդհանուր համաձայնության դեպքում, իրականացնել այնպիսի նախագիծ, ինչպիսին է, օրինակ, Սուխում-Թբիլիսի ուղղությամբ երկաթուղային հաղորդակցությունը»,- ասել էր նա: