ՄԱԿ-ը արտակարգ դրություն է հայտարարել Գազայի հատվածի մայրաքաղաքում, որոշ թաղամասեր ջրածածկ են երկու օր տեւած անդադար անձրեւների հետեւանքով, փոխանցում է «ՌԻԱ Նովոստին»:
Գործակալությունը նշում է, որ զոհեր եւ տուժածներ չկան, բայց ջրհեղեղների պատճառով հարյուրավոր պաղեստինցիներ լքել են տները: Իրադրությունը վատթարացնում են ավերված շենքերը եւ ենթակառույցները, որոնք մնացել են Իսրայելի բանակի եւ Պաղեստինի գրոհայինների ամառվա հակամարտությունից հետո, որը տեւել է 50 օր:
«Գազայի հատվածում ՄԱԿ-ի ենթակառույցը գործի է դրել իր հնարավորությունները՝ տեղական իշխանության մարմիններին վառելիք, խմելու ջուր, հիգիենիկ եւ դեղորայքային միջոցներ արտակարգ մատակարարելուհամար», - գործակալության հաղորդագրությունն է մեջբերում աղբյուրը:
Գազայում ջրհեղեղների պատճառով փակվել են 63 դպրոցներ, որտեղ ընդհանուր առմամբ սովորում է 65 հազար աշակերտ: Եվս 43 դպրոց գործունեությունը դադարեցրել է Գազայի հատվածի հյուսիսային մասում, որը նույնպես տուժել է տեղատարափ անձրեւներից: