Լոռու մարզի ընդհանուր իրավասության դատարանում սկսվել է Վանաձորում 2013թ.-ի հոկտեմբերի 12-ին դանակահարության պատճառով մահացած 15-ամյա Դավիթ Հովակիմյանի գործով կալանավորված՝ Լոռու մարզի գլխավոր վիրաբույժ Վլադիմիր Ղուկասյանի գործով դատավարությունը. Նոյեմբերի 27-ին կայացած դատական նիստին պաշտպանական կողմը մի շարք միջնորդություններ է ներկայացրել, որոնց մի մասը բավարարվել է:
«Մենք դատախազին կոչ արեցինք քաղաքացիական արիություն ունենալ եւ ինքնաբացարկ հայտարարել, քանի որ կարծում ենք, որ նա օբյեկտիվ եւ անկողմնակալ չէ: Իհարկե, դատախազը մերժեց, որից հետո մենք մի շարք միջնորդություններ ներկայացրինք, դրանցից մեկը հարցում էր, որ ես արել էի «Վանաձոր» բժշկական կենտրոն՝ կապված Ղուկասյանի ընտրած բուժման մեթոդի հետ: Պարզվեց, որ 2000թ.-ից այս հիվանդանոց նմանատիպ վնասվածքներով տեղափոխվել է 13 անձ, որոնք ստացել են այն բուժումը, ինչ Դավիթ Հովակիմյանը: Բուժման այս մեթոդը նախորդ 13 դեպքերում տվել է դրական արդյունք»,- NEWS.am-ի թղթակցի հետ զրույցում ասաց ամբաստանյալի փաստաբան Ռուբեն Հակոբյանը:
Պաշտպանական կողմը պատրաստվում է նաեւ խափանման միջոց կալանքը փոխելու վերաբերյալ միջնորդություն ներկայացնել: Նոյեմբերի 27-ին նրանք դա չեն արել, քանի որ աշխատանքային ժամն ավարտվել է եւ նիստը հետաձգվել մինչեւ դեկտեմբերի 9-ը:
«Հետաքրքրական է, որ տուժողի իրավահաջորդը՝ Դավիթի հայրը, դատարանում հայտարարեց, որ բժշկին մեղավոր ճանաչում է, սակայն խափանման միջոցի հարցը թողնում է թողնում է դատարանի հայեցողությանը: Ի դեպ, նախկինում նախաքննական մարմինն ասում էր, թե տուժողի իրավահաջորդը խիստ դեմ է, որ խափանման միջոցը փոխվի»,- ավելացրեց նա:
Փաստաբանը հայտնեց նաեւ, որ առաջին դատական նիստն անցել է լեփ-լեցուն դահլիճում:
Ըստ մեղադրական եզրակացության՝ Վլադիմիր Ղուկասյանին մեղադրանք է առաջադրվել այն բանի համար, որ նա որպես բժիշկ-վիրաբույժ իր մասնագիտական պարտականությունները դրանց նկատմամբ անփույթ եւ անբարեխիղճ վերաբերմունքի հետեւանքով կատարել է ոչ պատշաճ եւ անզգուշությամբ առաջացրել բուժվող հիվանդ Դավիթ Հովակիմյանի մահը:
Բժշկին մեղադրանք է առաջադրվել Քրեական օրենսգրքի 130-րդ հոդվածի 2-րդ մասով, որը նախատեսում է ազատազրկում՝ երկուսից վեց տարի ժամկետով՝ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով՝ առավելագույնը երեք տարի ժամկետով կամ առանց դրա: Վլադիմիր Ղուկասյանը կալանավորված է:
Հիշեցնենք, որ ըստ ոստիկանության՝ 2013թ. հոկտեմբերի 12-ին, ժամը 19.35-ին, «Վանաձոր» բժշկական կենտրոն է տեղափոխվել Երեւանի բնակիչ, 15-ամյա Դավիթ Հովակիմյանը՝ «կրծքավանդակի ծակած վերք» ախտորոշմամբ: Նույն օրը ժամը 22.00-ի սահմաններում Դ. Հովակիմյանը հիվանդանոցում մահացել է: Հոկտեմբերի 13-ին, ժամը 01.50-ին սպանությունը կատարելու կասկածանքով իր բնակարանից բերման է ենթարկվել 1991թ. ծնված, նախկինում դատապարտված Կարեն Կ.-ն՝ «Քուրդ» մականունով: Պարզվել է, որ նա հոկտեմբերի 12-ին ժամը 19.20-ի սահմաններում Վանաձորի Կ. Դեմիրճյան փողոցի հարեւանությամբ գտնվող այգում, վիճաբանության ժամանակ, դանակով հարվածել է Դ. Հովակիմյանին, որից հետո վերջինս հիվանդանոցում մահացել է: Գործն արդեն դատարանում է: Նշենք, որ Դավիթը Վանաձոր էր մեկնել՝ հանդբոլի Հայաստանի առաջնության եզրափակիչ մրցաշարին մասնակցելու համար:
