Եվրասիական տնտեսական միության համաձայնագրից բխող տրանսպորտային հարցերին պարզաբանումներ տալու, տրանսպորտային ոլորտում նախատեսվող իրավական փոփոխությունները քննարկելու, հետագա աշխատանքներն արդյունավետ կազմակերպելու նպատակով ՀՀ տրանսպորտի եւ կապի նախարարությունում նոյեմբերի 28-ին տեղի ունեցավ կլոր սեղան-քննարկում։
Քննարկմանը մասնակցում էին ՀՀ տրանսպորտի եւ կապի նախարարի առաջին տեղակալ Արթուր Առաքելյանը, տրանսպորտի վարչության պետի տեղակալ, բեռնափոխադրումների քաղաքականության բաժնի պետ Դավիթ Մելքոնյանը, բեռնափոխադրումներ իրականացնող ընկերությունների բազմաթիվ ներկայացուցիչներ։
ՀՀ տրանսպորտի եւ կապի նախարարի առաջին տեղակալ Արթուր Առաքելյանը ներկաներին հանգամանորեն ներկայացրեց, թե որոնք են տրանսպորտի ոլորտում ԵՏՄ-ին միանալու առանձնահատկությունները։
Բարձրացված բոլոր հարցերին տրվեցին սպառիչ պատասխաններ։
Կլոր սեղան-քննարկման մասնակիցներն արձանագրեցին, որ համաձայնագրին միանալուց հետո գործունեության ընթացքում չեն առաջանա խնդիրներ եւ խոչընդոտներ, իսկ նախարարության տված պարզաբանումները լիարժեք են եւ բավարար։
ՀՀ տրանսպորտի եւ կապի նախարարի առաջին տեղակալ Արթուր Առաքելյանը նշեց, որ ԵՏՄ-ին անդամակցելու ինչպես առաջին շրջանում, այնպես էլ հետագայում նախարարությունը պատրաստակամ է բեռնափոխադրումներ իրականացնող ընկերություններին տրամադրել անհրաժեշտ խորհրդատվություն եւ օժանդակում։
