Կառավարության ընդունելությունների տանն այսօր՝ նոյեմբերի 28-ին, Հայաստանում ԵՄ պատվիրակության եւ Գերմանիայի միջազգային համագործակցության ընկերության (ԳՄՀԸ) աջակցությամբ տեղի ունեցավ ՀՀ Վերահսկիչ պալատի նախաձեռնած միջազգային համաժողովը` «Հայաստանի արտաքին աուդիտի անկախության եւ արդյունավետության հզորացումը» թեմայով:
Համաժողովի մասնակիցներն էին ՀՀ Վերահսկիչ պալատի, ՀՀ օրենսդիր եւ գործադիր իշխանության մարմինների, միջազգային գործընկերների, քաղաքացիական հասարակության, միջազգային աուդիտորական բարձրագույն մարմինների ներկայացուցիչներ եւ փորձագետներ:
Համաժողովի բացման խոսքով հանդես եկավ ՀՀ Վերահսկիչ պալատի նախագահ Իշխան Զաքարյանը:
«Անկախությունն ու արդյունավետությունն իսկապես հռչակված նպատակային արժեքներ են, եւ մենք ձգտելու ենք դրանց կատարելագործմանը` երկրում ընթացող հիմնական բարեփոխումների համատեքստում: Անցած 7 տարիների ընթացքում եւ՛ պետական, եւ՛ հասարակական հարթակներից խոսվել է, որ մեզ հաջողվել է ուժեղացնել վերահսկողական բաղադրիչը: Պետական ռեսուրսների կառավարման եւ օգտագործման գործում արդեն նկատելի է զգոնությունն ու ուշադրությունը: Այս համատեքստում ՎՊ-ն, օրենսդիր եւ գործադիր մարմինների հետ համագործակցելով, հասել է որոշ ոլորտներում վաղուց արմատացած խնդիրների լուծմանը:
Վերահսկիչ պալատը պատժիչ ձեռք չէ, ավելին՝ այն կանխարգելիչ կարեւոր օղակ է: Ռեւիզիոն մոտեցումներն այլեւս անցյալում են: Մենք որդեգրել ենք INTOSAI սկզբունքներին եւ արժեքներին հարազատ քաղաքականություն, եւ այս գործում չափազանց կարեւոր է միջազգային համագործակցությունը…»,- իր խոսքում ասաց Իշխան Զաքարյանը:
Հայաստանում Եվրամիության պատվիրակության ղեկավար, դեսպան Թրայան Հրիսթեան իր ելույթում նշեց, որ աուդիտի բարեփոխումները գերագույն կարեւորություն ունեն, եւ Եվրամիությունը ցանկանում է Հայաստանում տեսնել ուժեղ Վերահսկիչ պալատ: «Պետական շղթայի կատարելագործման համար հույժ կարեւոր է, որ ԵՄն շարունակի հատկացնել բյուջետային աջակցությունը, որպեսզի բարեփոխումները շարունակվեն: Կարիք կա արագացնելու դրանց իրականացումը՝ միջազգային կառույցների հռչակագրերին եւ Հայաստանի ստանձնած պարտավորություններին համահունչ»,ասաց Հրիսթեան` հավելելով, որ ԵՄ պատվիրակությունը երկարաժամկետ հատվածում պատրաստ է օժանդակել ՎՊին:
Հայաստանում Գերմանիայի դեսպան Ռայներ Մորելը, իր համաձայնությունը հայտնելով պարոն Հրիսթեայի հնչեցրած մտքերի հետ, նշեց, որ Գերմանիան աջակցում է ՎՊ բարեփոխումներին` հավատալով, որ այն զարգացման անքակտելի նախադրյալ է:
Բոլոր մասնակիցները՝ թե՛ միջազգային փորձագետներն ու թե՛ ՀՀ պետական իշխանության ներկայացուցիչները, ամփոփելով քննարկումները, արժեւորեցին ՀՀ Վերահսկիչ պալատի անցած ուղին եւ կատարած աշխատանքները, կարեւորեցին նոր բարեփոխումների անհրաժեշտությունը ներկա փուլում եւ իրենց աջակցությունը հայտնեցին այդ բարեփոխումները կյանքի կոչելու դժվարին գործին:
