«Ես գիտեմ, թե որքան դժվար է ժողովրդավարության ճանապարհը բռնած երկրների համար պայքարել ազատության, հավասարության եւ արդարության արժեքների ներդրման համար: Եվ ես այսօր այստեղ եմ, որպեսզի քաջալերեմ ձեզ ձեր դժվարին աշխատանքի կատարման հարցում»: Այդ մասին հուլիսի 5-ին հայտարարել է ԱՄՆ պետքարտուղար Հիլարի Քլինթոնը Հայաստանի հասարակական կազմակերպությունների ներկայացուցիչների հետ հանդիպմանը:
Ըստ պետքարտուղարի՝ «ժողովրդավարությունը պահանջում է ոչ միայն ընտրություններ, այլ նաեւ ազատ երկխոսության, գաղափարների ազատ փոխանակման հնարավորություն, թափանցիկ կառավարում, հաշվետու կառավարություն եւ ամենից առաջ ամուր քաղաքացիական ուժ, որը ոչ թե բավարարվում է ստատուս քվոյով, այլ սատարում է ավելի առողջ, ավելի ազատ հասարակության կառուցում»:
«ԱՄՆ-ը հավատացած է, որ ժողովրդավարությունը ծաղկում եւ բարգավաճում է այն երկրներում, որտեղ քաղաքացիական հասարակության անդամները հարգված են եւ ազատ աշխատելու հնարավորություն ունեն»,- նշել է Քլինթոնն ու հայտնել, որ երեկ նախագահ Սերժ Սարգսյանի եւ այլ բարձրաստիճան պաշտոնյաների հետ հանդիպման ժամանակ ընդգծել է իր աջակցությունը Հայաստանում ժողովրդավարության զարգացմանը եւ իր մտահոգությունն է հայտնել Հայաստանում ԶԼՄ-ների ազատության վերաբերյալ: Մասնավորապես Քլինթոնն անդրադարձել է Հեռուստատեսության եւ ռադիոյի մասին օրենքում վերջերս կատարված փոփոխությունների վերաբերյալ եւ նշել, որ այդ կապակցությամբ մտահոգություններ կան ԱՄՆ-ում, ԵԱՀԿ-ում եւ Եվրամիությունում: «Ես բարձրացրեցի այս խնդիրները եւ պատասխան ստացա, որ կառավարությունը պատրաստ է այս աշնանը մեկ անգամ եւս վերանայել նախագիծը, եւ մեր երկիրը պատրաստ է այս հարցում համագործակցել Հայաստանի հետ եւ աջակցել Հայաստանում լրագրողների պաշտպանության հարցում, քանի որ միայն այս պարագայում Հայաստանի ժողովուրդը կարող է ստանալ այն տեղեկատվությունը, որն անհրաժեշտ է ծաղկուն ժողովրդավարություն կառուցելու համար»:
ԱՄՆ պետքարտուղարը նկատել է, որ հասարակական կազմակերպությունները եւ լրագրողները տարիներ շարունակ աշխատել են, որպեսզի ամրապնդեն կապերը ժողովուրդների միջեւ ինչպես Հարավային Կովկասի տարածաշրջանում, այնպես էլ` Թուրքիայի հետ: «Անկախ նրանից, թե ինչ ոլորտում է ձեզանից յուրաքանչյուրն աշխատում ավելի առողջ հասարակություն կառուցելու համար` լինի դա առողջապահությունը, ազատ ընտրությունների թե տեղեկատվության ազատ փոխանցման ոլորտը, ես շնորհակալ եմ ձեզնից եւ խնդրում եմ շարունակել ձեր գործունեությունը: Այն մարտահրավերները, որոնք ծառացած են ձեր առջեւ, ավելին չեն, քան այն մարտահրավերները, որոնք Հայաստանը հաղթահարել է: ԱՄՆ-ը, Օբամայի վարչակազմը եւ ԱՄՆ-ի ժողովուրդը ձեզ հետ են` ձեզ սատարելու եւ օժանդակելու հասնելու այն ապագային, որը դուք ձեզ համար նախատեսել էիք»:
