«Հայաստանի Սահմանադրության ամենախախտվող դրույթը 3-րդ հոդվածն է՝ մարդը, նրա արժանապատվությունը, հիմնական իրավունքները և ազատությունները բարձրագույն արժեքներ են»,- հուլիս 5-ին լրագրողների հետ հանդիպման ժամանակ հայտարարել է ՍԴ անդամ Ֆելիքս Թոխյանը:
Նրա խոսքով՝ 2005 թվականի Սահմանադրության փոփոխություններում մեծագույն քայլեր արվեցին, որպեսզի մարդու իրավունքները ընդլայնվեն ու պաշտպանվեն, սակայն կան նաեւ Սահմանադրությամբ նշված օրենքներ, որոնք մինչեւ հիմա ԱԺ-ում չեն ընդունվել: «Մեխանիզմների տեսակետից օրենսդիրը ունի լրջագույն աշխատանք, որ պետք է անի: Մեզ մոտ հատկապես սոցիալական իրավունքները ավելի շատ հռչակված են, քան թե կյանքի են կոչված»,- հայտնել է ՍԴ անդամը: Թոխյանի խոսքով, Սահմանադրությունը արդյունավետ կլինի, եթե լինի սահմանադրական դաշտ կամ մշակույթ: Անդրադառնալով Սահմանադրության 15-ամյակի առթիվ կազմակերպված միջոցառումներին՝ նա ցավով նշել է, որ դահլիճը լիքը չի եղել, նույնիսկ քաղաքական էլիտայի շատ ներկայացուցիչներ են բացակայել:
