Հայ-թուրքական հարաբերությունների կարգավորման անհեռանակարային իրավիճակում Ռուսաստանի ինչ-որ լուրջ գործողություններ ակնկալելը միամտություն է: Այդ մասին ինտերնետային մամուլի ասուլիսի ժամանակ հայտարարեց Ռազմավարական հետազոտությունների ռուսական ինստիտուտի փոխտնօրեն Գրիգորի Տիշչենկոն՝ ի պատասխան NEWS.am-ի հարցին՝ Մոսկվան արդյոք ունի՞ հայ-թուրքական հարաբերություններում միջնորդի դերում հանդես գալու մտադրություն՝ հաշվի առնելով վերջերս Մոսկվայի եւ Անկարայի միջեւ տնտեսական ոլորտում ձեռքբերված պայմանավորվածությունները:
Եթե թողնենք դիվանագիտական լեզուն, ապա նրա խոսքով, Հայաստանը շատ կցանկանար, որպեսզի Ռուսաստանը Հայոց ցեղասպանության ճանաչման հարցում ճնշի Թուրքիային: «Հասկանալի է, որ այստեղ առկա է Հոլոքոստի համար Գերմանիայի կողմից իր պատասխանատվությունը ճանաչելու լուռ վկայակոչումը: Գործնականում Հոլոքոստի դեպքում դա աշխատեց միայն որովհետեւ Գերմանիան պարտվեց պատերազմում եւ անվերապահորեն ստորագրեց կապիտուլյացիան: Այսինքն պետությունը դադարեց գոյություն ունենալ: Թելադրվում էին ցանկացած պայմաններ», - հիշեցրեց Գրիգորի Տիշչենկոն: Հիտլերյան կոալիցիայի մնացյալ երկրները, որոնք նույնպես անմեղ չեն հրեա ժողովրի ոչնչացման հարցում, ինչ-որ չեն շտապում ներողություն խնդրել եւ փոխհատուցումներ վճարել: «Ինչպես ասում են իրավաբանները, Թուրքիայի կողմից Հայոց ցեղասպանության ճանաչումը դատական հեռանկար չունի: Անկեղծ լինենք. այս անհեռանկարային իրավիճակում Ռուսաստանից ինչ-որ լուրջ գործողություններ ակնկալելը միամտություն է: Ուշադրություն դարձրեք, որ Ռուսաստանում հայկական սփյուռքը այդ հարցը չի քարոզում: Մնացած տարաձայնությունները, ինչպես ես եմ հասկանում, ածանցյալ են այս խնդրից», - եզրափակեց փորձագետը: