Հայոց ցեղասպանության 100-րդ տարելիցի Երուսաղեմի հանձնախումբը կայքի նախագիծ է նախաձեռնել: Հայ ժողովրդի ցեղասպանության 100-րդ տարելիցին նվիրված կայքի նպատակն է՝ իսրայելցի ընթերցողին ծանոթացնել XX դարասկզբի այդ սարսափելի ողբերգությանը:
«Նոյան տապան» կենտրոնում NEWS.am-ին տեղեկացրեցին, որ նախագծի հեղինակները հույս ունեն, որ Իսրայելի բնակչության շրջանում այդ երկրի ակադեմիայի եւ մտավորականության հետ համագործակցությամբ տարվող աշխատանքն արդյունքում կազդի այդ հարցի շուրջ իսրայելական կառավարության դիրքորոշման վրա:
Կայքը երկու լեզվով է՝ ռուսերեն եւ եբրայերեն, որպեսզի բնակչության բոլոր շերտերը կարողանան ծանոթանալ խնդրին: Հնարավորության սահմաններում կայքը կհամալրվի նոր նյութերով:
