Ռուսական շուկայում արտասահմանյան մեքենաների դեֆիցիտ է, դեկտեմբերի 17-ին հայտնում է «Վեդոմոստին»՝ վկայակոչելով մատակարար ընկերությունների աղբյուրները: Դիստրիբյուտորները դիլերներին այլեւս մեքենաներ չեն մատակարարում, վերջիններս էլ դադարեցնում են վաճառքը: «Ավտոստատ» վերլուծական գործակալության տվյալով՝ 23 ավտոարտադրողներ գները բարձրացրել են դեկտեմբերի սկզբին:
Թերթի տվյալով՝ BMW-ն դեկտեմբերի 16-ին դիլերներին տեղեկացրել է պատվիրած ավտոմեքենաների համար երկու օրվա ընթացքում վճարելու անհրաժեշտության մասին: Jaguar Land Rover-ի ներկայացուցչությունը դեկտեմբերի 19-ից դադարեցնում է մատակարարումները Ռուսաստան՝ մինչեւ գների վերահաշվարկը: Միաժամանակ, Land Rover-ը նոյեմբերին արդեն ինդեքսավորել էր գները մինչեւ 15 տոկոս:
Ռուբլու փլուզման հետեւանքով երեք խոշոր դիլերներ՝ «Major», «Ավիլոն» եւ «Տրանստեխսերվիս», ամբողջությամբ դադարեցրել են վաճառքը: «Դիլերների համար նման պայմաններում անիմաստ է մնացած մեքենաները վաճառել ձգտելը.: Շուկայում դեֆիցիտ է, վաճառվում են անգամ այն մեքենաները, որոնց գներն արդեն բարձրացել են», — Auto-dealer.ru-ի գլխավոր տնօրեն Օլեգ Դացկիվի խոսքերն է փոխանցում «Վեդոմոստին»: