Արա Նռանյանը որեւէ պաշտոն չի ստանալու, ու ՀՅԴ-ն էլ իշխանությունների հետ կոալիցիա չի կազմելու: Այս մասին ԱԺ-ում լրագրողներին հայտնել է ՀՅԴ խմբակցության ղեկավար Արմեն ռուստամյանը՝ անդրադառնալով լուրերին, թե ՀՅԴ անդամ Արա Նռանյանը նշանակվելու է Միջազգային տնտեսական ինտեգրման եւ բարեփոխումների նախարարի տեղակալ (Նախարարը Վաչե Գաբրիելյանն է):
«Ինչու է ամեն անգամ նման արձագանք ստանում որեւէ դաշնակցականի՝ որեւէ տեղ աշխատանքի ընդունվելը, ու չպետք է մենք որեւէ կերպ հարաբերվենք իշխանությունների հետ: Խնդիրն այն է, որ սկսել ենք պետությունն ու իշխանությունները նույնականացնել: Դե ուրեմն հանենք բոլոր այն ընդդիմադիր անձանց անունները, որ որեւէ տեղ աշխատում են ու պահանջենք, որ դուրս գան աշխատանքից»,- վրդովվել է Արմեն Ռուստամյանը:
Արմեն Ռուստամյանի խոսքով՝ մի բան է պետական պաշտոն ունենալ, ուրիշ բան իշխանության մեջ լինել եւ համագործակցել նրանց հետ:
«Որպեսզի ապացուցենք, որ մաքրամաքուր ընդդիմություն ենք, ուրեմն պիտի ոչ մի պաշտոն չզբաղեցնե՞նք պետության մեջ եւ թողնենք հեռանա՞նք Հայաստանից»,- նշեց խմբակցության ղեկավարը: