NASA-ի Curiosity մարսագնացը չափել է Մարսի մթնոլորտում Քամբերլենդ ժայռը հորատելիս զատված մեթանի փունջը եւ օրգանական մոլեկուլներ հայտնաբերել, հայտնում է Lenta.ru-ն՝ վկայակոչելով NASA-ի կայքը: Սա կարող է անցյալում կամ ներկայում մոլորակում կյանքի գոյության ապացույց լինել:
Curiosity-ն կառավարող գիտնականների խումբը առայժմ չի կարող նշել Մարսի վրա գազի աղբյուրը, այն կարող է լինել կենսաբանական եւ ոչ կենսաբանական բնույթի, սակայն Երկրի վրա մեթանի 95 տոկոսը ստացվում է միկրոօրգանիզմներից: Մեթանի կենդանական ծագումն ապացուցելու համար՝ հավելյալ ուսումնասիրություններ կպահանջվեն: Ածխածին պարունակող մոլեկուլները, որոնք հայտնաբերվել են ժայռը հորատելիս, կարող են նաեւ ապացույց չլինել, որ Մարսում կան կամ եղել են միկրոօրգանիզմներ: Սակայն դրանք մատնանշում են կյանքի առաջացման բարենպաստ պայմանները:
Curiosity մարսագնացն այժմ Մարսի Գեյլի խառնարանի շրջանում է: Ավելի վաղ մարսագնացի հետազոտությունները ցույց են տվել, որ Մարսի մակերեւույթին գոյություն են ունեցել ընդարձակ լճեր: Բացի դրանից, ըստ գիտնականների, Մարսի մթնոլորտն ի վիճակի է եղել օդի ջերմաստիճանը զրո աստիճանից բարձր պահել: