Արմավիրի մարզի Էջմիածին քաղաքում այսօր՝ դեկտեմբերի 17-ին, քաղաքի խանութների մեծ մասը փակ են: Հաց եւ այլ անհրաժեշտ իրեր գնելու համար բաց խանութ փնտրող քաղաքացիների մոտ խուճապ էր առաջացել: Նրանք NEWS.am-ի հետ զրույցում բողոքեցին, որ ինչ-որ բան գնելու համար ստիպված են քաղաքի մի ծայրից մյուսը հասնել:
«Էս մի խանութն ա բաց մնացել, էն էլ ամեն ինչը թանկ ա: Հացը՝ 220, 240, 250 դրամ ա դառել: Երել 200 հարյուր էր: Բուդը 1400 էր, էն էլ թալան-թալան տարան»,-ասաց քաղաքացիներից մեկը:
Մեկ ուրիշ քաղաքացի էլ ստեղծված իրավիճակի համար խանութների սեփականատերերին եւ իշխանությանը մեղադրեց. «Նոր տարվա համար մի բան ենք ուզում առնել, չենք կարում առնենք: Սպասում են՝ գները լավ թանկանա, առնեն, ծախեն: Էս բոլորի համար իշխանությունն ա մեղավոր: Առաջին անկարգը իշխանությունն ա»,- ասաց քաղաքացիներից մեկը:
Քաղաքացիներից ոմանք խանութներից հեռանում էին առանց որեւէ բան գնելու.«Ոչ մի բան էլ չեմ առել: Իզուր դուրս եմ եկել, ներվայնացած հետ եմ գնում»:
Խանութները, որոնք բաց էին, վաճառում էին միայն այն ապրանքները, որոնք այսօր էին ստացել:
«Շատ ապրանքի գներ չգիտենք, ինչը որ ստացել ենք այսօր, դրանց գները գիտենք, վաճառում ենք, որը որ չգիտենք, չենք վաճառում: Մարդ կա՝ հասկանում ա, մարդ կա՝ չի հասկանում, նեղանում ա: Էսօր 200-ով հաց ենք ստացել, սմետան ենք ստացել, երշիկ ենք ստացել, դրանք ենք վաճառում»,-ասաց խանութներից մեկի աշխատակիցը:
Նշենք, որ քաղաքում նաեւ որոշ դեղատներ էին փակվել, ինչն ավելի էր վրդովեցրել մարդկանց:
«Ապտեկան որ փակել են, բժշիկը դեղ ա նշանակում, չառնեն, հիվանդը մեռնի՞: Խի սենց բա՞ն են անում, միանգամից ասեն՝ գնա, մեռի: Լսել են, որ 14 տոկոսով թոշակ են տալու, բարձրացնում են»,- NEWS.am-ին բողոքեց մի տատիկ: