Բռնությունն անասնական զգացում է: Այս մասին դեկտեմբերի 17-ին լրագրողների հետ զրույցում հայտարարեց Ազգային ժողովի խոսնակ Գալուստ Սահակյանը՝ մեկնաբանելով ՀԱԿ խմբակցության քարտուղար Արամ Մանուկյանի դեմ հարձակումը:
«Ես խոսում եմ՝ առանց որեւէ կողմի պաշտպանելու. դա երեւույթ է, որը չպետք է գոյություն ունենա: Մարդը տուն է գնում, նույն ինքը՝ Արամ Մանուկյանը, եւ հանկարծ նրա վրա հարձակվում են: Ինչ էլ նա արած լինի, ինչ թշնամիներ էլ ունենա, բռնությունն անասնական զգացում է»,- հավելեց Սահակյանը:
Մյուս կողմից, ըստ նրա, խոսքը մարդու վրա ավելի ուժեղ է ազդում, քան ցանկացած բռնություն:
Հարցին, ինչպե՞ս պատասխանել հայհոյանքին, Սահակյանը պատասխանել է. «Իհարկե, եթե նման բան տեղի ունենա, իմ կողմից պատասխան կհետեւի, բայց համարժեք եւ գրական լեզվով: Իմ հանգիստ, բայց հաստատուն պատասխանն ավելի ազդեցիկ կլինի»,- հավելեց նա:
Հիշեցնենք, որ դեկտեմբերի 11-ի երեկոյան Ազգային ժողովի ՀԱԿ խմբակցության քարտուղար Արամ Մանուկյանն իր տան մոտ հարձակման էր ենթարկվել: Անհայտ անձը հարձակվել էր Արամ Մանուկյանի վրա եւ հարվածել: Ոստիկանությունը քննություն է վարում: Ոչ իշխանական ուժերի պատգամավորները պահանջում են գտնել եւ պատժել մեղավորներին, ինչպես նաեւ պաշտոնանկ անել պատասխանատու պաշտոնատար անձանց: