Երեւանի Մալաթիա-Սեբաստիա վարչական շրջանում՝ Անդրանիկի արձանի մոտ, այսօր՝ դեկտեմբերի 18-ին, գազի գնի բարձրացման դեմ բողոքող՝ միջքաղաքային երթուղայինների մի քանի տասնյակ վարորդներ կրկին կանգնեցրել են երթուղայինները: Վարորդները, որոնց նախորդ օրվա բողոքի ակցիայի ժամանակ Երեւանի տրանսպորտի վարչության պետ Հենրիկ Նավասարդյանը խոստացել էր երկօրյա ժամկետում քննարկել խնդիրը, պահանջում են անհամապաղ միջոցներ ձեռնարկել եւ իջեցնել գազի սակագինը: (ֆոտոռեպորտաժ)
«Մեր հարցի անհապաղ լուծում ենք պահանջում: Մեր ցավոտ տեղը հիմա այն է, որ կարողանանք մեր առաջվա գներով սպասարկել, կարողանանք աշխատել ու մի քանի կոպեկ էլ տուն տանենք: Թող մի լուծում գտնեն: Մեզ պարզ չի՝ ինչի հիման վրա գազը թանկացավ: Երեկ ասեցին՝ դուք աշխատեք, երկու օրում հարցը կլուծենք, բայց երկու օր պատկերացրեք ինչ վիճակ կլինի, եթե աշխատենք: Ամեն ինչ, բացի գազը, օր օրի թանկանում է»,-NEWS.am-ին ասաց վարորդներից Հենրիկ Կոջամանյանը՝ նշելով, որ ինքը դեմ է, որ խնդիրը լուծվի ուղեվարձի թանկացման միջոցով:
Այս պահին Անդրանիկի արձանի մոտ՝ Րաֆֆու փողոցում, կանգնած են 63, 71, 75 համարի բոլոր երթուղայինները: Վարորդները մյուս երթուղայինների վարրոդներին եւս կոչ են անում միանալ իրենց բողոքին:
«Կազմակերպվեք, իքնասիրությունը լավ բան ա», «թասիբ ունեցեք» կոչերով են վարորդները դիմում այն երթուղայինների վարորդներին, որոնք հրաժարվում են միանալ բողոքին եւ կանգնեցնել երթուղայինը: Որոշ վարորդներ ասում եմ, որ կմիսնան միայն այն դեպքում, եթե բողոքի ակցիայի պահանջը ուղեվարձը 200 դրամ դարձնելը լինի:
Վարորդները դեռ չեն որոշել՝ միանալ Նոր Նորքից Կառավարության շենք շարժվող իրենց գործընկերներին, թե ոչ:
Բողոքող վարորդներին զանգով տեղեկացրել են, որ մինչեւ 17:30-ը իրենց հետ պատկան մարմինները կհանդիպեն: Նրանք պատրաստվում են սպասել մինչեւ այդ ժամը:
Լուսանկարները՝ Արսեն Սարգսյանի /NEWS.am