Եվրախորհրդարանը դեկտեմբերի 18-ին վավերացրել է ԵՄ-ի հետ Վրաստանի ասոցացման համաձայնագիրը: Համաձայնագրին կողմ են քվեարկել Եվրախորհրդարանի 490 պատգամավորները՝ ընդդեմ 76-ի: Ձեռնպահ է մնացել 57 պատգամավոր, փոխանցում է «Նովոստի-Գռուզիան»:
ԵՄ-ի հետ Վրաստանի ասոցացման համաձայնագիրը, որի անքակտելի մասն է կազմում խոր եւ համապարփակ ազատ առեւտրի գոտու համաձայնագիրը, ստորագրվել էր հունիսի 27-ին Բրյուսելում: Փաստաթղթի ամբողջական ուժի մեջ մտնելու համար անհրաժեշտ է դրա վավերացումը այն ստորագրած ԵՄ անդամ երկրների խորհրդարաններում:
Փաստաթղթի վավերացմանը ներկա են եղել Վրաստանի նախագահ Գեորգի Մարգվելաշվիլին, արտգործնախարար Թամարա Բերուչաշվիլին, Վրաստանի խորհրդարանի երկու պատգամավորներ՝ արտաքին կապերի հանձնաժողովի նախագահ Թեդո Ջափարիձեն եւ եվրոպական ինտեգրման հարցերով հանձնաժողովի նախագահ Վիկտոր Դոլիձեն, որը «Մեր Վրաստան՝ ազատ դեմոկրատներ» ընդդիմադիր կուսակցության առաջնորդներից մեկն է:
Բացի դրանից, վավերացմանը ներկա է եղել Վրաստանի փոխնախագահ Միխայիլ Սահակաշվիլին, որին Ստրասբուրգում տվյալ միջոցառմանը հրավիրել էր ԵԽ-ի Եվրոպական ժողովրդական կուսակցությունը: