Չեչնիայի Հանրապետության ղեկավարի մամուլի քարտուղար Ալվի Քարիմովը մեկնաբանել է լրագրող Քսենիա Սոբչակի՝ ՌԴ նախագահ Վլադիմիր Պուտինին ասուլիսի ժամանակ ուղղված հարցը: Սոբչակը հայտարարել էր, որ Չեչնիայի առաջնորդ Ռամզան Քադիրովը խախտել է ՌԴ Սահմանադրությունը՝ ահաբեկիչների հարազատների հետապնդման մասին հայտարարելով:
Պուտինն ի պատասխան ասել էր, որ Ռուսաստանում Բոլորն են պարտավոր պահպանել օրենքները եւ ոչ ոք մինչդատական հաշվեհարդարների իրավունք չունի: Նախագահը հավելել էր, որ Չեչնիայի Հանրապետության ղեկավարն էմոցիոնալ հայտարարություն է արել, եւ այդ էմոցիաները հասկանալի են:
Ալվի Քարիմովը Սոբչակին ի պատասխան հայտարարել է. «Ռամզան Ախմատովիչը երբեք չի խախտել Սահմանադրությունը», փոխանցում է Russia Today-ը:
Ըստ նրա՝ Սոբչակն աղավաղել է փաստերը նախագահին հարց ուղղելիս:
Հիշեցնենք, դեկտեմբերի 4-ին Գռոզնիում ահաբեկչություն էր կատարվել, զոհվել էր 14 ոստիկան: Դրանից հետո Քադիրովը հայտարարել էր, որ ոստիկանների մահը գնահատում է որպես իր հարազատների մահ, ուստի կոշտ կպայքարի ահաբեկիչների դեմ:
