Թուրքիայի քրդական «Ժողովուրդների դեմոկրատական» կուսակցության առաջնորդ Սելահաթին Դեմիրթաշը կուսակցության Սիիրթի (Սղերթ-խմբ) նահանգային համաժողովի ժամանակ անհարմար դրության մեջ է հայտնվել։

Թուրքական Milliyet-ի փոխանցմամբ՝ կուսակցության Սիիրթի նահանգային համաժողովի համար Սիիրթ մեկնած HDP-ի առաջնորդ Սելահաթին Դեմիրթաշը քաղաքացիների ջերմ ընդունելությանն է արժանացել, սակայն իրեն մոտեցող եւ համբուրող կանայք այնքան շատ են եղել, որ Դեմիրթաշն անհարմար դրության մեջ է հայտնվել։

Նույնիսկ համաժողովի ընթացքում նստած ժամանակ նրան են մոտեցել եւ համբուրել կանայք։ Այս իրավիճակը տեսնելուց հետո նրա թիկնապահները ստիպված են եղել թույլ չտալ քաղաքացիներին մոտենալ Սելահաթին Դեմիրթաշին մինչ համագումարի ավարտը։

Նշենք, որ Սելահաթին Դեմիրթաշը բազմիցս դատապարտել է Օսմանյան Թուրքիայում իրականացված Հայոց ցեղասպանությունը եւ պնդել, որ Թուրքիան պետք է ճանաչի Ցեղասպանությունը։