Եվրամիությունը արգելել է Ղրիմ արտահանել ավելի քան 200 անուն ապրանք՝ սովորական կրակվառիչից մինչեւ նավեր, լողացող սարքեր «օդանավեր եւ տիեզերանավեր, ինչպես նաեւ դրանց պահեստամասեր»: Ամբողջական ցանկը ներառված է Ղրիմի նկատմամբ նոր պատժամիջոցների փաստաթղթում, որը համաձայնեցվել է դեկտեմբերի 18-ին եւ հրապարակվել ԵՄ պաշտոնական ամսագրում:
Այդ ապրանքները պայմանականորեն բաժանվել են 8 կատեգորիաների, բայց ըստ էության, արգելվում է թերակղզի արտահանել ցանկացած արդյունաբերական արտադրանք, հաղորդում է ՏԱՍՍ-ը:
Բացի այդ, ԵՄ-ն արգելել է իր ընկերություններին զբոսաշրջային ծառայություններ մատուցել Ղրիմի տարածքում, իսկ եվրոպական ընկերությունների զբոսանավերն այլեւս իրավունք չունեն մտնել 7 նավահանգիստներ՝ Սեւաստոպոլ, Կերչ, Յալթա, Ֆեոդոսիա, Եվպատորիա, Չերնոմորսկ եւ Քաշիմ-Բուրուն:
Եվրոպական ընկերություններն այսուհետեւ չեն կարող տեխնոլոգիաներ ու սարքավորումներ մատակարարել տրանսպորտի, հեռախաղորդակցության, էներգետիկայի, հետախուզության եւ ածխաջրածինների եւ հանքանյութերի համար, ինչպես նաեւ աջակցել կամ միջնորդական ծառայություններ մատուցել այդ ոլորտներում ենթակառուցվածքների ստեղծման համար: