Եթե եւ երբ Որոտանի ՀԷԿ-երի համալիրի վաճառքի համաձայնագիրը վերջապես ստորագրվի, իսկ ես կարծում եմ, որ այն կստորագրվի, դա շատ մեծ առավելություն կլինի Հայաստաի եւ ԱՄՆ-ի համար: Այս մասին դեկտեմբերի 19-ի մամուլի ասուլիսում NEWS.am-ի թղթակցի հարցին ի պատասխան ասել է ՀՀ-ում առաքելությունն ավարտող ԱՄՆ-ի արտակարգ եւ լիազոր դեսպան Ջոն Հեֆերնը: Հարցը վերաբերում էր նրան, թե որ փուլում են գտնվում Որոտանի ՀԷԿ-երի համալիրի վաճառքի բանակցությունները:
Նշված գործարքը, ըստ դեսպանի, շատ կարեւոր ներդրումային ծրագիր է երկու երկրների համար: «Հայաստանի համար դա ԱՄՆ-ի կատարած ամենախոշոր ներդրումը կլինի եւ կօգնի դիվերսիֆիկացնել երկրի էներգետիկ հատվածը: Այդ պատճառով կարծում եմ, որ գործարքը շատ կարեւոր նախագիծ կլինի Հայաստանի համար՝ ռազմավարության տեսանկյունից», - ընդգծել է Ջոն Հեֆերնը:
Հիշեցնենք, 2013թ. նոյեմբերի 27-ին Հանրային ծառայությունները կարգավորող հանձնաժողովը հավանություն էր տվել «Որոտանի ՀԷԿ-երի համալիր» ՊՓԲԸ-ն ամերիկյան «Contour Global» ընկերության դուստր ձեռնարկությանը վաճառելու գործարքին, որը պատրաստակամություն էր հայտնել ներդնել 180 մլն դոլար: Միաժամանակ ՀՀ-ում ԱՄՆ դեսպան Ջոն Հեֆերնը հայկական կողմին զգուշացրել էր զերծ մնալ գործարքը խզելուց: «Եթե գործարքը չկայանա, դա լուրջ ազդանշան կլինի արեւմտյան ներդրողների համար: Դա ցույց կտա, թե որքանով է Հայաստանը պատրաստ նման խոշոր եւ լուրջ գործարքների», - ասել էր դիվանագետը:
