Ես համոզված են, որ ԱՄՆ-ի պետքարտուղար Ջոն Քերրին կայցելի Հայաստան, սակայն ժամկետների մասին տեղեկություններ չունեմ: Այդ մասին այսօր՝ դեկտեմբերի 19-ին, հրաժեշտի մամուլի ասուլիսի ժամանակ հայտարարեց Հայաստանում իր դիվանագիտական առաքելությունն ավարտող ԱՄՆ-ի արտակարգ եւ լիազոր դեսպան Ջոն Հեֆերնը՝ ի պատասխան NEWS.am-ի թղթակցի հարցին՝ կա՞ն արդյոք ինչ-որ նորություններ ԱՄՆ-ի պետքարտուղար Ջոն Քերիի սպասվող այցի հետ կապված:
Դեսպանը հիշեցրեց, որ պետքարտուղար Ջոն Քերրին խոստացել է այցելել Հայաստան: «Նա ծրագրում է այց կատարել Հայաստան: Սակայն ներկայումս աշխատում է այլ մեծ խնդիրների շուրջ՝ միջուկային բանակցություններ եւ Իրանի նկատմամբ պատժամիջոցներ, պաղեստինյան-իսրայելական հարց, ինչպես նաեւ զբաղվում է Ռուսաստան-Ուկրաինա հարաբերություններով», - նշեց Հեֆերնը՝ միաժամանակ համոզվածություն հայտնելով, որ պետքարտուղարը կայցելի Հայաստան:
Հիշեցնենք, որ ԱՄՆ-ի պետքարտուղար Ջոն Քերրին խոստացել է 2014թ. այցելել Հայաստան: