Դրամի կայունացումը ամենեւին էլ կապ չունի հայաստանյան իշխանությունների կամ Կենտրոնական բանկի ձեռնարկած քայլերի հետ: Այս մասին NEWS.am-ի թղթակցի հետ զրույցում ասաց տնտեսագետ Արտակ Մանուկյանը:
Նա նշեց, որ կայունացումը մեծ հաշվով կապված է Ռուսաստանի Դաշնության Կենտրոնական բանկի մի քանի ուշացած քայլերի, ինչպես նաեւ ՌԴ նախագահի ելույթի հետ, որը դրական ազդեց շուկայի սուբյեկտների վրա: Արտակ Մանուկյանի համոզմամբ՝ ՌԴ-ում տեղի ունեցոդ իրադարձությունները, միտումները գոնե կիսով չափ կրկնվում են մեզ մոտ:
«Հովիկ Աբրահամյանի այցը սուպերմարկետներ ոչ մի ձեւով կապված չէր դրամի կայունացման հետ, դա քաղաքական շոուի բաղադրիչ էր, ինչ-որ առումով դա կարող է բարոյահոգեբանական էֆեկտ ունենալ, մարդկանց մոտ հույս արթնացնել»,-ասաց տնտեսագետը: Նա նաեւ նշեց, որ կառավարության ղեկավարը գնաճի դեմ ունի շատ ավելի գործուն գործիքներ, քան այցելություններն են: Եւ վերջին հաշվով, եթե գների իջեցումը կամ բարձրացումը հիմնավորված լինեն, Հովիկ Աբրահամյանը նախագահ էլ լիներ, թե վարչապետ, որեւէ բան չի կարող փոխել: Տնտեսագետն ասաց, որ ՏՄՊՀ-ն ճիշտ կաներ մերկապարանոց հայտարարությունից զատ իր գործառույթները ամբողջովին օգտագործեր, որը կանդրադառնար մարդկանց կյանքի վրա, նրանք կտեսնեին, որ արդար մրցակցություն կա:
Արտակ Մանուկյանը նշեց նաեւ, որ այդ ընթացքում օլիգարխի կապիտալով բավական մարդիկ գերշահույթներ ստացան, սպեկուլացիաներ եղան: Նա շեշտեց, որ մեզանում գների բարձրացումը ավելի արագ է լինում, քան իջեցումը եւ մոնոպոլ տնտեսության պարագայում՝ մարդկանց վիճակը շուտ չի թեթեւանա: Տնտեսագետը կանխատեսեց, որ գների որոշակի իջեցումներ կլինեն, բայց Ամանորի նախաշեմին նորից գնաճ կլինի:
