Հայաստան-Վրաստան էլեկտրահաղորդման գծի կառուցումը նախատեսվում է սկսել 2015 թվականին եւ ավարտել մինչեւ 2018 թվականը: Այս մասին նշվել է այսօր՝ դեկտեմբերի 19-ին, ՀՀ էներգետիկայի եւ բնական պաշարների նախարար Երվանդ Զախարյանի եւ Զարգացման վարկերի բանկի /KFW բանկի/ ներկայացուցիչներ Էվա Վիթի, Լարս Օերմանի եւ Հայաստանի Հանրապետությունում Գերմանիայի Դաշնային Հանրապետության արտակարգ եւ լիազոր դեսպան Ռայներ Մորելի հետ հանդիպման ժամանակ:
Նախարարը շնորհակալություն է հայտնել KFW բանկի ներկայացուցիչներին համագործակցության եւ Հայաստանում իրականացված ծրագրերի, մասնավորապես՝ հաջողությամբ եւ սահմանված ժամկետում ավարտված «Գյումրի-2» 220կՎ հզորությամբ ենթակայանի վերակառուցման ծրագրի համար:
Բանկի ներկայացուցիչների հետ հանդիպման ժամանակ քննարկվել է Հայաստան-Վրաստան բարձրավոլտ էլեկտրահաղորդման գծի կառուցման ծրագրի 2-րդ փուլը /առաջին փուլի պայմանագիրը ստորագրվել է վերջերս/ առաջին փուլին զուգահեռ իրականացնելու հնարավորությունը:
KFW բանկի ներկայացուցիչները դրական դիրքորոշում են հայտնել այդ հարցի վերաբերյալ, նշելով, որ այդկերպ կօպտիմալացվեն այդ ծրագրի համար նախատեսված ծախսերը:
Հանդիպման մասնակիցները նշել են, որ Հայաստան-Վրաստան էլեկտրահաղորդման գծի կառուցումը հնարավորություն կտա Հայաստանից Վրաստան էլեկտաէներգիայի փոխանակման հոսքերը հասցնել մինչեւ 700 կՎ-ի, բացի դրանից հնարավորություն կտա Հայաստանի էներգահամակարգին զուգահեռ աշխատել Վրաստանի եւ Իրանի էներգահամակարգերի հետ:
Նախարար Երվանդ Զախարյանը նշել է, որ Հայաստան-Վրաստան բարձրավոլտ էլեկտրահաղորդման գծի, ինչպես նաեւ Իրան-Հայաստան բարձրավոլտ 3-րդ գծի կառուցման ծրագրերը նոր որակ կհաղորդեն տարածաշրջանային էներգահամակարգերին ինտեգրման գործընթացին:
