Հայոց բանակում ինքնասպանությունների դեպքերը խեղաթյուրված են եւ իրականությունը երբեք չի բացահայտվի, քանի որ վկաները չեն խոսի: Այս մասին այսօր` դեկտեմբերի 19-ին, լրագրողների հետ հանդիպմանն ասաց «Զինվոր» հասարակական կազմակերպության նախագահ Մարգարիտա Խաչատրյանը:
«Պետք է դրդապատճառները պարզվեն, սակայն զինվորների մոտ ընդունված է միմյանց դեմ վկայություն չտալ: Չկա, վկա չունեն, ոչ մեկը չի խոսի, դեպքերն այդպես էլ չեն բացահայտվի»,- ասաց Մարգարիտա Խաչատրյանը՝ կարծիք հայտնելով, որ հայ զինվորը հենց այնպես երբեք իր վրա ձեռք չի բարձրացնի։
Հասարակական գործիչը, այնուամենայնիվ, նշեց, որ այժմ զինվորների սոցիալական եւ բարոյահոգեբանական վիճակն անհամեմատ լավ է, եւ բանակում գրեթե բավականաչափ կարգուկանոն է հաստատվել:
«Փողոցային բիրտ բարքերն այլեւս բանակ չեն ներթափանցում: Հասել ենք նրան, որ բանակի վիճակն ավելի գերազանց վիճակում է, քան մեր հասարակության վիճակը, որովհետեւ բանակում զինծառայողը երեք անգամ նորմալ սնվում է, համազգեստի եւ հիգիենիկ պարագաների բոլոր համալրումները կան: Ծեծը համարյա թե բացակայում է բանակից: Եթե առաջ բազմաթիվ խոշտանգումների դեպքեր կային, ապա այսօր կարող ենք ասել, որ դրանք բանակում վերացել են, եւ բարոյահոգեբանական վիճակը բարելավվել է»,- ասաց Խաչատրյանը:
Անդրադառնալով հակառակորդի վերջին դիվերսիոն հարձակումներին` նա ավելացրեց, որ դրանք ոչ թե հարձակումներ են, այլ կարճատեւ պատերազմներ:
«Քանի դեռ հայ զինվոր է զոհվում բանակում, մենք զինադադար չունենք», - նշեց Մարգարիտա Խաչատրյանը:
