«Արաբկիր» բժշկական կենտրոնում նախորդ տարվա հունվարի 2-ին մահացած 2-ամյա Լիա Միսակյանը  մահացել է թարախաֆիբրինային թոքաբորբից, որը նրա մոտ  զարգացել է մահվանից 4-6 օր առաջ: Այս մասին այսօր՝ դետեմբերի 19-ին, Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանում հայտարարեց Լիա Միսակյանի դիակի դատաբժշկական փորձաքննությունն իրականացրած փորձագետ Սանասար Սեւոյանը:

«Նման տիպի թոքաբորբն ունի չորս փուլ: Բոլոր փուլերը միասին 9-10 օր են տեւում։ Այն փուլը, որը նկարագրված է եզրակացության մեջ երրորդ փուլն է: Դա գորշ լյարդացման փուլն է: Այս փուլը լինում է հիվանդության 4-6-րդ օրը:Երեխան մահացել է ամսի 2-ին։ Եթե 4 օրով հաշվենք, հիվանդությունը սկսվել է դեկտեմբերի 29-ին»,- ասաց փորձագետը՝ պատասխանելով մեղադրողի հարցերին:

Փորձագետը հերքեց պաշտպանական կողմի այն տեսակետը, որ փոքրիկ Լիան մահացել է կայծակնային զարգացող հիվանդությունից՝ ասելով, որ թարախի ու ֆիբրինի զարգացման համար ժամանակ է  հարկավոր. «Այն չէր կարող հինգ րոպեում զարգանալ»:

Պաշտպանական կողմին հետաքրքրեց, թե ինչու չի կատարվել վիրուսոլոգիական հետազոտություն՝ հիշեցնելով, որ հիվանդանոցում բուժքուրը երեխայի մոտ ախտորոշել է սուր շնչառական ինֆեկցիա, ինչին փորձագետը պատասխանեց, որ իրենք վիրուսոլոգիական հետազոտություն չեն կատարում։

«Դա հիմք չէր տալիս, առանց հետազոտման ընդունող բժիշկը գրել է «սուր ինֆեկցիա»: Բոլոր օրգանները ենթարկվել են ուսումնասիրութան: Վիրուսոլոգիական հետազոտություն չի կատարվում մեզ մոտ: Իմ եզրակացությամբ վիրուսի բակտերիայի մասին գրված չի եղել»,- ասաց փորձագետ Սեւոյանը:

Փորձագետին հարցեր ուղղելուց հետո պաշտպան Գիվի Հովհաննիսյանը հայտարարեց, որ իրենք պատրաստվում են միջնորդել, որպեսզի դատարանը դիակի դատաբժշկական  փորձաքննության եզրակացությունը անթույլատրելի ապացույց ճանաչի:

«Փորձագետը չէր եկել օբյեկտիվ պարզաբանություն տալու, շեշտը դնում էր թոքաբորբի վրա: Միայն նպատակ էր հետապնդում թոքաբորբը հիմնավորել:Կողմանակալությունը երեւում էր այն հարցում, երբ ասաց, որ բժիշկը առանց հետազոտելու է սուր շնչառական ինֆեկցիա ախտորոշել»,- ասաց փաստաբան Գիվի Հովհաննիսյանը:

Գիվի Հովհաննիսյանի կարծիքով, փորձագետ Սանասար Սեւոյանի եւ մյուս փորձագետ, բժշկագիտական գիտությունների թեկնածու Գագիկ Հարությունյանի միջեւ պայմանավորվածություն է եղել նույն տեսակետը պնդել՝ «մեկը մյուսին պահել»:

Դատավոր Ավետիսյանը այդ հայտարարութունը ապացույցի գնահատում համարեց, ինչը դատաքննության փուլում անթույլատրելի է: Դատավորը փաստաբանին խորհուրդ տվեց քրեական հետախուզություն իրականացնող մարմիններին դիմել, եթե կարծում է, որ փորձագետների միջեւ հանցավոր պայմանավորվածություն կա:

Դատավոր Ավետիսյանը նիստի ժամանակ նկատողություն կատարեց մեղադրյալ, մանկաբույժ Լիլիթ Վարդանյանին, պահանջեց չխոսել եւ չժպտալ:

«Ինչո՞ւ եք այդքան խոսում եւ այդքան ժպտում, հիշեք՝ որտեղ եք եւ ինչ կարգավիճակում»,- ասաց դատավորը:

Դատական քննությունն այսօր չավարտվեց, քանի որ պաշտպան Երեմ Սարգսյանը միջնորդեց հետաձգել նիստը եւ ժամանակ խնդրեց, որպեսզի կողմնորոշվի կրկնակի հանձնաժողովային փորձաքննություն անցկացնելու վերաբերյալ միջնորդություն ներկայացնի, թե ոչ:

Դատական նիստը հետաձգվեց, հաջորդ նիստը կլինի հաջորդ տարի հունվարի 27-ին:

Հիշեցնենք, որ 2 տարեկան Լիան «Արաբկիր» բժշկական կենտրոն էր տեղափոխվել դեկտեմբերի 31-ին: Սկզբում, դեղամիջոցներ ընդունելուց հետո, փոքրիկն իրեն ավելի լավ էր զգացել, բայց մեկ օր անց նրա վիճակը վատացել է եւ աղջնակը մահացել է: «Արաբկիր» բժշկական համալիրի մանկաբույժներ 28-ամյա Լիլիթին եւ Զարինեին մեղադրանք է առաջադրվել Քրեական օրենսգրքի 130-րդ հոդվածի 2-րդ մասի հատկանիշներով, որը նախատեսում է ազատազրկում՝ 2-6 տարի ժամկետով, իսկ որոշ պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով՝ առավելագույնը 3 տարի ժամկետով: Խափանման միջոց է ընտրվել ստորագրությունը չհեռանալու մասին: