Խորհրդարանական ոչ իշխանական ուժերը ցույց տվեցին, որ կարեւոր հարցերում չեն տարբերվում ազգադավ իշխանություններից։ Այս մասին այսօր՝ դեկտեմբերի 19-ին, լրագրողների հետ զրույցում ասաց ԱԻՄ առաջնորդ Պարույր Հայրիկյանը՝անդրադառնալով ԵՏՄ-ին Հայաստանի անդամակցության օրինագծին խորհրդարանում կողմ քվերակած ոչ իշխանական ուժերին։
«Խորհրդարանական չիշխանական ուժերը կարեւոր հարցերում ոչնչով չեն տարբերվում այս ազգադավ իշխանություներից։ Ժամանակակից աշխարհում առկա բոլոր սպառնալիքները ԵՏՄ-ն պարունակում է իր մեջ, իսկ Ռուսաստանը ճգնաժամ արտադրող երկիր է, այդպիսի ղեկավարությամբ, սեփական ժողովրդին չհարգող երկիրը դատապարտված է ձախողումների»,-ասաց Պարույր Հայրիկյանը։
Նրա խոսքով՝ բոլոր այն քաղաքական ուժերը, որոնք գիտակցում են ԵՏՄ վնասակարությունը Հայաստանի համար, պետք է միավորվեն, համատեղ պայքարեն։
«Պետք է ԵՏՄ-ի վտանգավորությունը , վնասակարությունը հասկացող մարդիկ համախմբվեն, միասնական ճակատով դիմագրավեն, իսկ այն, որ մեզ լուրջ փորձություններ են սպասվում, դա անտարակուսելի է, եւ այն, որ այս իշխանությունները ոչ թե ընդունակ չեն, այլ բոլորովին էլ չեն մտածում, որ դիմակայելու հարց կարող է ծագել, դա նույնպես ակնհայտ է։ Ես հիմա դիմում եմ «Ժառանգությանը», «Ազատ դեմոկրատներին», «ՀՀՇ»-ին եւ մնացած ուժերին, որ համախմբվեն»,-ասաց նա։
Պարույր Հայրիկյանի գնահատմամբ՝ երկրում ստեղծված իրավիճակը Հայաստանի իշխանությունների վարած քաղաքականության հետեւանք է. «Այս ամենը հետեւանք է Հայաստանի իշխանությունների ապազգային, հակաքաղաքակրթական, պուտինյան խելագարությանը ընդառաջ գնալու քայլերին»։
