Ազգային ժողովի փոխնախագահ, ՀՀԿ մամուլի խոսնակ Էդուարդ Շարմազանովը ոչ իշխանական ուժերին խորհուրդ է տալիս քաղաքական եւ տնտեսական հարցերով զբաղվել, իսկ իրավական հարցերը թողնել փաստաբաններին, դատավորներին, քննիչներին: Այսօր` դեկտեմբերի 19-ին, ՀՀԿ ԳՄ նիստից հետո լրագրողները Շարմազանովից հետաքրքրվեցին, թե ինչու իշխանությունները դատապարտեցին ոստիկանապետի տեղակալ, ոստիկանության զորքերի հրամանատար գեներալ-լեյտենանտ Լեւոն Երանոսյանի վարքը, սակայն պաշտոնանկ չարեցին, եթե հաշվի առնենք, որ համաժողովրդական շարժումը նման բան էր պահանջում:
«Երանոսյանի վրա բողո՞ք կա: Ոչ, չկա: Երկրորդ` ես բազմիցս ասել եմ, որ ես իրավական խնդիրներին չեմ խառնվում եւ խորհուրդ կտամ իրավական խնդիրները թողնել փաստաբաններին, դատավորներին, դատախազներին, քննիչներին, հետաքննիչներին: Երկրում այնքան քաղաքական եւ տնտեսական խնդիրներ կան, որ քաղաքական գործիչները թող զբաղվեն դրանցով»,- ասաց նա:
Ինչ վերաբերվում է Երանոսյանին պաշտոնանկ անելուն, Շարմազանովի խոսքով` դա Հանրապետության նախագահի լիազորությունների շրջանակում է:
Նշենք, որ օրերս Լեւոն Երանոսյանը հայտարարել էր, որ «ով Սերժ Սարգսյանին բան ասի, ականջները կկտրեմ»: Այս հայտարարությունից հետո ոչ իշխանական ուժերը հայտարարել էին, որ սա պաշտոնեական դիրքի չարաշահում է եւ պետք է անմիջապես պաշտոնանկ անել նրան: