Ղարաբաղա-ադրբեջանական սահմանին լարվածությունը տարեցտարի ավելանում է, բայց պատերազմ չի լինի, Ադրբեջանը որոշել է նման կերպ պատերազմ վարել Արցախի բանակի հետ: Այս մասին այսօր՝ դեկտեմբերի 21-ին, լրագրողների հետ զրույցում ասաց ԼՂՀ ՊԲ հրամանատար, գեներալ-լեյտենանտ Մովսես Հակոբյանը:
«Եթե համեմատենք օգոստոսյան դեպքերի հետ, առաջին գծում հիմա իրավիճակը որոշակիորեն հանգիստ է, բայց եթե համեմատենք նախորդ տարիների հետ՝ տարեցտարի մեր առաջին գծում լարվածությունը բավականին սրանում է, եւ դա միայն կապված է հակառակորդի պահվածքի հետ: Բայց չեմ կարծում, որ պատերազմ կլինի, Ադրբեջանը որոշել է այս կերպ պատերազմ վարել Արցախի բանակի հետ»,- ասաց Մովսես Հակոբյանը:
Մովսես Հակոբյանը չբացառեց, որ հնարավոր է՝ առաջիկայում Մոսկվայում կայանալիք ՀԱՊԿ անդամ պետությունների պաշտպանության նախարարների խորհրդի հերթական նիստի օրերին սրվի սահմնային լարվածությունը:
«Ցանկացած հանդիպմանը՝ կապված Լեռնային Ղարաբաղի հիմնախնդրի հետ, Ադրբեջանը փորձում է լարել իրավիճակն առաջին գծում, եւ մենք այս պահին եւս սպասում ենք այդպիսի լարվածության»,- ասաց ՊԲ հրամանատարը:
Ամփոփելով 2014թ.՝ Մովսես Հակոբյանը նշեց, որ պաշտպանության բանակն այս տարի եւս փառքով է կատարել իր առջեւ դրված խնդիրը՝ ԼՂ ժողովրդի անվտանգության ապահովումը:
