Հայաստանում ԱՄՆ-ի դեսպան Ջոն Հեֆերնը, Երեւանում երեք տարվա դիվանագիտական առաքելությունն ավարտելով, վերադարձել է հայրենիք:
Իր վերջին՝ հրաժեշտի տեսաուղերձում դեսպանը շնորհակալություն է հայտնել բոլոր գործընկերներին եւ կիսվել Երեւանում ստացած իր տպավորություններով: Մասնավորապես, Հեֆերնը նշել է, թե ԱՄՆ-ի դեսպանատունը ցանկանում է, որ Հայաստանը հաջողության հասնի որպես ժողովրդավար, խաղաղ եւ ապահով երկիր: Նա բաց երկնքի քաղաքականությունն ու ՏՏ ոլորտը մատնանշել է որպես Հայաստանի հետ հաջող գործընկերության օրինակ: «Մենք որոշակի բարելավում տեսանք բիզնես միջավայրում եւ ակնկալում ենք ավելին տեսնել», - հայտարարել է Հեֆերնը:
Ըստ նրա՝ ԱՄՆ-ն կանի հնարավորը Հայաստանի եւ Թուրքիայի հետ հարաբերությունների կարգավորումն առաջ մղելու, նաեւ՝ բանակցությունների միջոցով ղարաբաղյան հարցին խաղաղ լուծում տալու համար: «Այս ուղղություններում հաջողությունն ամենից ավելի կնպաստի այս ռազմավարական կարեւոր տարածաշրջանի բացմանը», - նշել է դիվանագետը: Հեֆերնն ընդգծել է, որ դեսպանատունը գործընկերներ է գտել տարբեր հատվածներում՝ քաղաքացիական հասարակություն, մամուլ, նախարարություններ, գործարարներ: Սակայն նրանք պետք է իրար հետ աշխատեն: «Ես վստահ եմ, որ Հայաստանը լուսավոր ապագա ունի, գիտելիքահեն տնտեսության ապագա», - ասել է նա: Ջոն Հեֆերնը բոլորին շնորհակալություն է հայտնել այն ամենի համար, որ արել են իր եւ իր կնոջ՝ Լիբիի համար, հույս հայտնելով, որ շուտով կրկին կհանդիպի հայ բարեկամներին: Նա նաեւ ուրախ Սուրբ ծնունդ եւ երջանիկ Նոր տարի է մաղթել հայերին: