ՀԱՊԿ անդամ երկրների ղեկավարները նշել են ղարաբաղյան հիմնախնդրի բացառապես խաղաղ կարգավորման անհրաժեշտությունը: Այս մասին ասված է դեկտեմբերի 23-ին Մոսկվայում կայացած ՀԱՊԿ խորհրդի նիստի ավարտին ընդունված ՀԱՊԿ անդամ երկրների ղեկավարների համատեղ հայտարարության մեջ:
«Մենք՝ ՀԱՊԿ անդամ երկրների ղեկավարներս, նշում ենք նաեւ ղարաբաղյան հիմնախնդրի բացառապես խաղաղ կարգավորման անհրաժեշտությունը՝ ընդգծելով ԵԱՀԿ ՄԽ համանախագահների ջանքերով այդ հակամարտության կարգավորման հիմնական սկզբունքների ուղղությամբ աշխատանքը շուտափույթ ավարտելու կարեւորությունը՝ Միջազգային իրավունքի նորմերի, ՄԱԿ-ի կանոնադրության, Հելսինկյան եզրափակիչ ակտի դրույթների հիմքով, որոնք մասնավորապես վերաբերում են ուժ կամ սպառնալիքներ չկիրառելուն, պետությունների տարածքային ամբողջականությանը, իրավահավասարությանը եւ ազգերի ինքնորոշման իրավունքին»,- ասված է հայտարարությունում:
