Եվրասիական տնտեսական միությանն անդամակցումը ոչ մի առումով շահավետ չէր Հայաստանի համար: Այս մասին դեկտեմբերի 25-ի մամուլի ասուլիսում հայտնել է «Ժառանգություն» կուսակցության փոխնախագահ Արմեն Մարտիրոսյանը:
Ամբողջ խնդիրը, ըստ նրա, իշխանության պահպանումն էր, այլ ոչ թե երկրի անվտանգության ապահովումը: ԵՏՄ-ին անդամակցության փաստաթղթերի ստորագրումից հետո, ընդգծել է Մարտիրոսյանը, Հայաստանի անվտանգության մակարդակը ոչ մի կերպ չի ավելացել: «Մենք տեսնում ենք, որ Ադրբեջանի հետ Ռուսաստանի ռազմաքաղաքական համագործակցությունը շարունակում է խորանալ», - ասել է նա:
ԵՏՄ-ի պատճառով Հայաստանի խնդիրները, ըստ քաղաքական գործչի, աստիճանաբար կխորանան: «Տնտեսական տեսանկյունից տեսնում ենք, որ զարգացում, ըստ էության, չկա. Առաջին անհրաժեշտության ապրանքները այս տարի կրկնակի թանկացել են: Այս տեսանկյունից էլ լավ հեռանկարներ չկան», - ասել է Արմեն Մարտիրոսյանը:
Հիշեցնենք, 2014թ. հոկտեմբերի 10–ին Մինսկում Հայաստանը ստորագրել էր Եվրասիական տնտեսական միությանն անդամակցելու պայմանագիրը: Դեկտեմբերի 19-ին ավարտվել էր անդամ երկրների կողմից դրա վավերացման գործընթացը:
