Հայաստանից Եվրասիական տնտեսական միության մյուս երկրներ մեքենաների վերարտահանումը կսահմանափակվի մաքսավճարներով: Այդ մասին NEWS.am-ի թղթակցին հայտարարեց ֆինանսների փոխնախարար Սուրեն Կարայանը:
Հոկտեմբերի 10-ից սկսած՝ (Եվրասիական տնտեսական միությանը Հայաստանի անդամակցության պայմանագրի ամսաթիվը) երրորդ երկրներից Հայաստան բերված մեքենաները հնարավոր կլինի վերաարտահանել ԵՏՄ-ի երկրներ՝ վճարելով միայն մաքսատուրքերի տարբերությունը (հայկական եւ ԵՏՄ-ի համար միասնական):
Մինչեւ 2020թ. Հայաստանը մեքենաները կներմուծի ներկայիս մաքսատուրքերով. ավելի ցածր, քան Մաքսային միության (2015թ.-ից՝ Եվրասիական միության) միասնական տուրքերը: «Մինչեւ հոկտեմբերի 10-ը ներմուծված մեքենաները հնարավոր կլինի դուրս բերել ԵՏՄ-ի մնացյալ երեք երկրներ առանց մաքսատուրքերի վճարումների տարբերության, իսկ դրանից հետո տարբերությունը պետք է վճարել», - հստակեցրեց Կարայանը: