2014թ.-ն դժվար տարի էր, հեշտ չէր։ Այս մասին այսօր՝ դեկտեմբերի 25-ին, լրագրողների հետ զրույցում ասաց ԱԺ փոխնախագահ, ՀՀԿ մամուլի խոսնակ Էդուարդ Շարմազանովը՝ ամփոփելով տարին։
«Անդրադառնալով քաղաքական տարուն՝ պետք է նշեմ, որ տարին հագեցած էր իրադարձություններով։ Դժվար տարի էր, հեշտ չէր։ Այս տարի ունեցանք թե նվաճումներ, թե ձեռքբերումներ, թե թերություններ։ Կուսակցության համար էլ էր տարին հագեցած»,- ասաց Շարմազանովը։
Նրա խոսքով՝ գործող իշխանության գերնպատակը Հայաստանի եւ Արցախի Հանրապետությունների անվտանգությունն է։
«Այս տարի էլ այս առաջնահերթությունները չեն փոխվել։ Հունվարյան եւ օգոստոսյան դեպքերը ցույց տվեցին, որ պատերազմը չի ավարտվել։ Մեր թիվ մեկ ձեռքբերումը եղավ համազգային միասնությունը, իսկ կորուստը՝ մեր տղաներն են, որոնք զոհվեցին»,- նշեց ՀՀԿ մամուլի խոսնակը։
Ինչ վերաբերվում է արտաքին քաղաքականությանը, ապա Շարմազանովի խոսքով՝ այս տարի Ադրբեջանի եւ Հայաստանի նախագահների հանդիպումները ցույց տվեցին, որ խաղաղ կարգավորումն այլընտրանք չունի եւ խնդիրը պետք է լուծվի Մինսկի խմբի ձեւաչափով։
«Հայաստան-Եվրամիություն հարաբերությունները շարունակելու են զարգանալ։ Բացի դրանից՝ Ռուսաստանի Դաշնության հետ հարաբերությունները խորացել են»,- ավելացրեց նա։