Կասկած չկա, որ Օսմանյան կայսությունում իրագործված Հայոց ցեղասպանության 100-րդ տարելիցի մոտենալուն զուգահեռ պաշտոնական Անկարան կուժեղացնի ժխտողական քարոզչությունը: Այս մասին NEWS.am-ի թղթակցի հետո զրույցում հայտարարեց Հայաստանի Ազգային ժողովի «Ժառանգություն» խմբակցության քարտուղար Թեւան Պողոսյանը՝ մեկնաբանելով Թուրքիայի նախագահի՝ 2015 թվականի ապրիլի 24-ին Հայաստան այցի հավանականությունը:
Նրա խոսքով, Ռեջեփ Թայիփ Էրդողանի այցն իրականություն կդառնա միայն միջազգային հանրության ճնշման ներքո: «Դա հիմնականում կախված կլինի այդ ժամանակահատվածում միջազգային թատերաբեմում տիրող իրավիճակից: Եթե Էրդողանը փոքր-ինչ զգա, որ միջազգային հանրության կողմից որեւէ ճնշում չի լինի Թուրքիայի հանդեպ, նա չի ժամանի Հայաստան»:
Ավելին, պատգամավորի խոսքով, թուրքական կողմը կուժեղացնի Հայոց ցեղասպանության ժխտման քարոզչությունը: «Ես չեմ հավատում, որ Թուրքիան կհրաժարվի Ցեղասպանության ժխտման քաղաքականությունից եւ որեւէ դրական քայլ կձեռնարկի: Իսկ Հայաստանը պետք է պատրաստ լինի դրան եւ աշխարհին պատվով ներկայացնի 100-ամյա վաղեմության իրադարձությունները»,- ամփոփեց Թեւան Պողոսյանը:
