Ստամբուլի դատախազ Հասան Իըլմազը բողոքարկել է հակակառավարական դավադրության գործով ձերբակալվածներից 8-ին երկրից դուրս չգալու ստորագրությամբ ազատ արձակելwւ դատարանի որոշումը:
Թուրքիայում դեկտեմբերի 14-ին իրականացված խմբագիրների եւ լրագրողների ձերբակալությունների լուրը արձագանք է գտել եվրոպական եւ ամերիկյան հայտնի լրատվամիջոցներում։ Այս իրադարձությանը շտապ արձագանքել է նաեւ ԱՄՆ պետքարտուղարության խոսնակ Ջեն Փսակին՝ շեշտելով, որ ոստիկանության գործողություններն ուղղված են թուրքական կառավարությանը քննադատած լրատվամիջոցներին։ Նա նշել է, թե մամուլի ազատությունը, դատական համակարգի անկախությունը ժողովրդավարության համար ծայրահեղ կարեւոր հանգամանք են եւ Թուրքիայի Սահմանադրության մեջ դրանք որպես սրբություն են ընդունվում։
Անցած շաբաթ Ստամբուլի դատարանը քննարկել է 12 կասկածյալներին կալանավորելու դատախազության միջնորդությունը եւ նրանցից 4-ին կալանավորելու որոշում ընդունել՝ մնացածներին ազատ արձակվելով երկրից դուրս չգալու ստորագրությամբ: Մասնավորապես, ազատ էր արձակվել Zaman ազդեցիկ թուրքական թերթի խմբագիր Էքրեմ Դումանլըն:
«Երկրից դուրս չգալու ստորագրությունը քննությունն իրականացնելու համար բավարար չէ», - ասվում է ազատ արձակվածների խափանման միջոցը փոխելու դատախազի միջնորդության մեջ:
