Արցախյան ազատամարտում մենք հաղթել ենք պատերազմում, սակայն տանուլ ենք տվել խաղաղության հարցում: Այդ մասին հայտարարել է «Ժառանգություն» կուսակցության առաջնորդ Րաֆֆի Հովհաննիսյանը՝ կուսակցության 6-րդ արտահերթ համագումարին: «Մենք պետք է կարողանանք կանխել պատերազմը եւ անհրաժեշտության դեպքում պատրաստ լինել դրան: Հայաստանը պետք է ճանաչի Ղարաբաղը, իր սահմանադրական սահմաններով: Պետք է պահանջենք Ադրբեջանից, որ վերջ տա հայկական հողերի օկուպացիային, ինչպես նաեւ պատասխան տա Ջուղայում հայ մշակութային կոթողների ոչնչացման համար»,- հայտարարել է Հովհաննիսյանն ու հավելել, որ Հայաստանը պետք է այնպես անի, որ «Արցախն ու Ադրբեջանը լինեն միջազգային ճանաչված երկու պետություն, իսկ արտաքին քաղաքականությունը պետք է հիմնված լինի ազգային շահերի վրա»: «Միայն այդ դեպքում մենք կհասնենք տարածաշրջանային խաղաղության եւ կայունության»,- նշել է Հովհաննիսյանը:
Անդրադառնալով հայ-թուրքական հարաբերություններին՝ Րաֆֆի Հովհաննիսյանը նկատել է, թե այդ հարաբերությունները առնացքային են, սակայն դրանք պետք է հիմնված լինեն ճշմարտության վրա: «Այլապես ամեն ինչ արկածախնդրություն է, այդ թվում՝ Հայաստանի իշխանությունների ձեռնարկած գործընթացը, որը տեղիք է տալիս թուրք-ադրբեջանական ագրեսիային եւ օկուպացիոն քաղաքականությանը, որի նպատակն է տիրանալ նաեւ Լեռնային Ղարաբաղին»,- ասել է Հովհաննիսյանը: Ըստ Հովհաննիսյանի՝ այս գործընթացում «Թուրքիան փորձում էր մեզ պարտադրել իր նախապայմանները»: «Այսօր քարտեզի վրա է դրված Հայաստանի արժանապատվության եւ տարածքային ամբողջականության խնդիրը, եւ պետք է թույլ չտանք, որ որեւէ մեկը մեզ կարողանա նախապայմաններ պարտադրել, անկախ նրանից, թե ինչ գլխարկ է կրում»,- նշել է «Ժառանգության» առաջնորդը:
Րաֆֆի Հովհաննիսյանն անդրադարձել է նաեւ ջավախահայության խնդիրներին: «Ջավախքը պետք է գտնի իր ազգային ինքնության բանաձեւը: Այդ բանաձեւը պետք է հիմնված Ջավախքի ժողովրդի ինքնավարության սկզբունքի վրա, եւ դա պետք է ճանաչեն ինչպես Հայաստանը, այնպես էլ Վրաստանը»,- ասել նա եւ հավելել, որ պետք է ազատ արձակվեն ջավախահայ գործիչները:
