SpaceX ընկերության հիմնադիր եւ Tesla Motors-ի գլխավոր տնօրեն Էլոն Մասքը Twitter-ի իր էջում հայտարարել է, որ մտադիր է ԱՄՆ-ում կառուցել Hyperloop (հիպերհանգուցային) փորձնական համալիրը (ուղեւորների տեղափոխման համար բարձր արագության խողովակաշար):

Մասքը Hyperloop-ի գաղափարի մասին հայտարարել էր դեռ 2013թ. օգոստոսին: Այն իրենից ներկայացնում է խողովակների համակարգ, որով տեղաշարժվում են ուղեւորներ տեղափոխող «կապսուլաները»: Դրանք կարող են զարգացնել մինչեւ 800 կմ/ժ արագություն:

«Փորձնական Hyperloop կկառուցենք ընկերությունների եւ ուսանողական թիմերի համար, ամենայն հավանականությամբ, Թեխասում», - Twitter-ի միկրոբլոգում գրել է Մասքը, հայտնում է Lenta.ru-ն:

Ակնկալվում է, որ տրանսպորտային համակարգը Լոս-Անջելեսի եւ Սան-Ֆրանցիսկոյի միջեւ հեռավորությունը կարող է հաղթահարել ընդամենը 35 րոպեի ընթացքում: